Desde un syerto tyempo, el grupo muy aktivo “Kara Kare” kreado por la manseves del “Yıldirim Spor Klübü” partisipa de una manera muy pozitiva al immenso esforso de muestra komunidad afin de introduzir una dinamika mueva en su persepsyon de varyos temas i problemas del djudaizmo aktual.
Ansi este anyo, a la okazyon de la sakra rememorasyon de la Shoha, esta aktiva komisyon del byen konosido Klub esportivo penso i parvino a azer venir en Turkia, por unos kuantos dias, “Serge Klarsfeld”, konsiderado komo uno de los mas importantes reprezentantes de la lucha kontra los aktos kriminales antisemites.
Desde largo tyempo resyento una muy grande admirasyon por la famiya Klarsfeld en su totalidad: Serge, Beate, Arnold i Lida... Los admiro por sus perseveransa a persigir en ke lugar del mundo ke sea, los ultimos monstres inhumanos ke partisiparon al jenosidyo nazi , los kualos (munchas vezes por razones de simple interes politiko) kedaron despues de la gerra, sin ser kastigados.
No se trato nunka de un simple dezeo de vengansa, ma de un akto de djustisya ke tyene una grande Valor pedagojika. “Ningun krimen kedara sin kastigo” mos ambeza la Biblia i “kada uno pagara por su propya kulpa...”
La djustisya es antes de todo una valor moral ke kontyene en eya la preskripsyon imperativa de la igualidad entre las personas i del respekto de la kriansa umana ken ke sea.Eya es uno de los mas importantes preseptos de la Etika Djudia i sinyifika implisitamente: “Djustisya en favor de los otros” komo tambyen “Djustisya en favor de si mizmo”.
Segun el Livro Santo, kuando muestros antiguos avuelos, en sus perigrinasyones, se instalavan en una mueva sivdad, una de las primeras kozas ke eyos azian era de estableser tribunales (mahkemes) i de dezinyar djuzgos eskojidos entre los mas savyos i los mas valorozos.
Eyos egzaminavan kada kavzo en el konteksto en el kual el akontesimyento se avia produzido, i entonses desidavan de la punisyon adekuada, afin ke ningun inosente kede sin apoyo ni ningun krimen enterrado en el olvido.
La punisyon inflijida a la sigida de un djusto djuzgamyento i a la dimensyon de la kulpa , es la afirmasyon ke “ kualkyer krimen perpetrado en una kompleta lusidita de esprito i libertad de aksyon” no kedara sin repuesta ... Ansi eya realsa la viktima en su derecho de “kriansa humana” i le restitue su dinyidad.
Por kontra ningun kastigo ira mas leshos kel solo kulpante; el Profeta mos rekomenda “ni el padre pagara por su ıjo, ni el ijo por su padre”.
Serge Klarsfeld pyedro su padre en el terrivle chaos de la Shoha ... El tenia una devda de esforso de reparasyon enverso el, komo mozotros todos tenemos la mizmas devda enverso muestros ermanos i ermanas indjustamente arrankados a la vida por la simple razon ke a una syerta epoka, eyos se topavan debasho la dominasyon de un monstre sanginaryo.
