No vo revenir sovre la ermoza ekspozisyon de fotografias organizada el 21 Marso por los myembros de la asosyasyon “Golden Age” segun el proyekto de Ester Sason kon la kontribusyon de Lori Sason i Tuna Mizrahi. La semana pasada, dos de muestras kolegas ya mos avlaron kon entusyazmo (kada una en su rubrika respektiva) de la atmosfera de grande amistad de estas reunyones entre mujeres i ombres aedados de mas de 65 anyos ke puede ser no se konosian en el pasado i ke oy en dia (enkuadrados de myembros de esta asosyasyon) fraternizan en toda sinseridad, kon en los ojos este maraviyozo reflekto de luz ke solo la kerensya puede asender.
Oy kero avlar de la importansa i sovre todo de la oportunidad de esta ermoza aktividad nombrada “Golden Age”, ovra kreada syete anyos antes grasyas a la inisyativa de Bensiyon Pinto ansi ke al lavoro de Eti Telvi <z.l.>, Eti Pinto, Şeli Elmas, Tamar Behar, Lina Filiba i Sara Mori, debasho la prezidensya de Mois Kohen i oy en dia enkavesada por Meri Maya, lakuala (kon su enerjia i su voluntad absoluta de ayudar su proksimo) se afirma kada dia mas en el kampo de la solidaridad humana.
Kero sovre todo avlar de esta realizasyon komunal relativamente mueva ke trespasa los klivajes sosyo-ekonomikos i grasyas a la kuala mujeres i ombres de una syerta edad son arrankados a la soledad ansi ke a este djenero de immobilizmo de personas ke no tyenen mas ninguna responsabilidad immedyata a kumplir i ke oy en dia enkontran de muevo la alegria de pueder komunikar.
Ay en esta realizasyon una mueva dimensyon affektiva i una mueva vizyon de los imperativos de la vida. Aktividad sosyal destinada a ser un espasyo avyerto a todos los veteranos, de ke kondisyon ekonomika ke sean, eya es para eyos komo un reflo de ayre puro.
Reunyones amigavles son organizadas, paseos ande partisipan los ke pueden o no pueden pagar, vijitas de lugares interesantes envezes mizmo historikos, konferansyas, projeksyones de filmos ke azen lavorar el esprito, sohbetes sovre varyos sujetos, atelyes de lavoros manuales ande kada uno transmete lo ke save i se ambeza lo ke no savia, enrekesimyento intelektual i kayentor sosyal ansi ke oportunidad de enkontrar paryentes o amigos pedridos de vista...
Tres puntos de enkontro a la hora fiksada, entre los myembros del komite egzekutivo i los partisipantes, el uno en Şişli, los otros dos en Kurtuluş i Cadde Bostan, ande munchos vyenen kon sus otomobil partikolar ke deshan en el garaje el mas serkano para suvir en uno de los otobuses engajados por la sirkunstansya ,afin de mesklarsen a los otros.
No kale olvidar ke mos topamos aktualmente en una epoka de mundyalizasyon ande la konsepsyon de la famiya troko inevitavlemente, ande (aunke persiste syempre el mizmo potensyal de amor resiproko) las ijas i los ijos son pushados a bivir sus propya vida munchas vezes diferente de la de sus madres i padres...
Es ke esta asosyasyon puedra rezolver enteramente el problema de la soledad? Por seguro no, ma avre una puerta i esto es importante.
