Un rezumen del deskorso de Netanyahu en la asamblea de AIPAC

El deskorso de Binyamin Netanyahu en la asamblea de AIPAC fue muy empresionante. Vos kero dar un rezumen de este deskorso ke fue muy emosionante por todos los oyentes, i partikularamente por los judios del mundo entero.

Dora NİYEGO Judeo-Espanyol
1 Nisan 2010 Perşembe

‘Estomos endjuntos aki porke i los dos paizes tenemos los mezmos ideales ke son, prokurar la sekuridad, la prosperidad i la pas en muestros paizes..

Un siglo antes, este esuenyo paresia emposivle a munchos judios. Duspues de la fondasion de muestro estado, por la primera vez en dos mil anyos, el puevlo judio se puido defenderse kontra todo modo de atakas.

Todos los emperios viejos se derrokaron uno detras de otro, muevos emperios se establisaron, i se derrokaron de muevo, ma los judios nunka desparesieron de la istoria, i kon el renasimiento del estado judio, una mueva esperansa nasio.

Antes de esto, los judios fueron objekto a munchas barbarias: muncha sangre koryo en la Edad Media, en la ekspulsion de los judios de Angletera, Espanya i Portugal., en el masakre de los judios de Ukrayna, en los pogromes en Rusia, i en el Holokosto. Kon la fondasion de muestro estado, las atakas no eskaparon, ma agora los judios se estan puediendo defendersen. Dainda las atakas no eskaparon. Esta vez, tenemos muncho mas nombrozos enemigos ke estan desidados a derrokarmos.

Kuando Ejipto i Jordania entendieron ke no vana pueder ganar en las gerras, se desidaron a azer pas kon mozos. Ma muestros enemigos de oy, keren alkansar sus objektivo kon el terorizmo, kon las atakas de misiles, i de armas atomikas. Esto es la veridad de oy.

La entision de İran de developar armas nukleares es una menasa por muestro estado, ma tambien es una menasa por la rejion entera, i el mundo entero.

El antisemitizmo de oy no es solo dirijado kontra el puevlo judio, ma mas muncho kontra el estado judio. Muestros enemigos estan pensando ke si el estado judio no egzistia, munchos problemas del mundo se puedian solver.

No kere dizir ke no puedemos kritikar İsrael. Komo kada demokrasia, muestro estado tiene sus emperfeksiones, ma estamos aziendo munchos eforsos, i munchos argumentos para pueder korijar muestras faltas. En muestro paiz, la otokritika es una forma de vida, i akseptamos ke la kritika es emportante para pueder solver las problemas enternasionales. Ma İsrael deve de ser djuzgado kon las mezmas normas ke son aplikadas a todas las otras nasiones. Las akuzasiones kontra İsrael deven de ser bazadas en veridades, i no en mintiras.

La koneksion entre el puevlo judio i la tierra de İsrael, i Yerushalaim no se puede inyegar. El puevlo judio izo la konstruksion de Yerushalaim tres mil anyos antes, i oy estan kontuneando a konstruizar Yerushalaim. Yerushalaim no es una kualsiker sivdad, ma es muestra kapital, ande mi governo esta manteniendo las politikas komo lo izieron todos los governos israelianos. Oy en diya, kaje un kuarto de milion de judios biven en la sivdad vieja de Yerushalaim, i estos lugares no se pueden separar de la sivdad moderna. El mundo entero save ke en un akuerdo de pas, este lugar va ser parte de İsrael. Por esta razon, la solusion de dos estados en Yerushalaim es emposivle.

No keremos governar dingun puevlo En la sivdad, la libertad para todas las relijiones es garantizada. Mi governo siempre amostro su dezeyo por la pas. Del primer diya, los yamimos para ampesar las negosiasiones de pas. Oy mezmo, lo esto yamando al Prezidente Abbas, ke venga a negosiar la pas.

Los lideres ke keren la pas deven de asentarsen frente kon frente. Los Estados Unidos puede ayudar a rezolver los problemas, ma no puede rezolver los problemas de las partes. La pas no puede vinir del eksterior, solo las negosiasiones direktas pueden dar konfiensa a las dos partes.

Mi estado esta pronto para azer las konsesiones neseserias por la pas. Estamos prontos a tomar riskos por la pas, ma nunka vamos a riskar la vida de muestro puevlo, ni la vida del uniko estado judio.

Mi puevlo kere un futuro sekuro ande muestros ijos no vana mas sufrir los orores de la gerra. Keremos un futuro en el kel, İsrael va pueder empleyar su potansiel komo un sentro global de teknolojia, va pueder dedikar su talete kreativo i sientifiko para ayudar a rezolver los problemas del diya.

No keremos mas gastar milliones de dolares para aretar el teror.

La kooperasion en munchos sujetos entre mi estado i los estados unidos es muy emportante para las dos partes. Estamos unidos aki porke kreemos en los mezmos ideales, i por modo de estos ideales, esto siguro ke İsrael i los Estados Unidos siempre vana estar endjuntos.