La muerte de una amiga

Klara PERAHYA Judeo-Espanyol
17 Mart 2010 Çarşamba

Es ansi para los humanos, ay un tyempo para la vida i el gozo, i un tyempo para la muerte i la dolor.

Elfi Alfandari nasida Elfi Caron (Karon), grande Dama de muestra komunidad, serro por syempre sus ojos la semana pasada,vensida desde largos anyos por el estado muy prekaryo de su salud.

De una grande  kultura  sovre nombrozos sujetos, eya guadro asta la fin de su vida una ermoza kuryozidad intelektual i tambyen un esprito bivo, avyerto a kualkyer muevo sujeto syentifiko i literaryo.

Ija de una madre Sefardi i de un padre ashkenaz, Elfi posedava  kondjuntamente une grande madureza de refleksyon i en mizmo tyempo una predispozisyon a la fantezia, lo ke es kon grande frekuensa el propyo del fruto de unyones de personas de diferentes horizentes.

Eleva asta su klotura del Liseo Alman durante la epoka del empesijo del nazizmo, ija del patron de una  libreria espesyalizada en la literaturya, la  filozofia ansi ke la prensa almana, Elfi vido pasar en el magazen de su padre (lugar ke paradoksalmente era un  punto de enkontro de varyos alemanes instalados o de pasaje en muestra sivdad) persones munchas vezes de Ideal i opinyones diferentes.

 Inevitavlemente eya asistia, en tanto ke oyidora involuntarya, a numerozas diskusyones ke avia entre sitizanos alemanes  en este periodo truvyo ande se aparejava imperseptivlemente los premisyos  del terrivle drama  ke iva kavzar la muerte  indinya de 6 milyones de djudyos...

Elfi fue  uno de los ultimos testigos en Turkia de los anyos oskuros  ande se sentia el peligro intensifikarse de dia en dia mas ... i muncho mas tadre, despues la terrivle trajedia, en una atmosfera diametralmente kontrarya a la presedente, kon por seguro partisipantes totalmente diferentes, eya asistyo a varyas konversasyones konsernando la kreasyon de un Estado Israelyano ke sera el ultimo refujyo del puevlo djudyo.

Aunke syempre attada i fidel al payis de su nasimyento ,eya resentiya en su persona un amor inkondisyonal por lo ke syempre a sus ojos reprezento i syempre reprezenta un inkontestavle avrigo para un puevlo esparzido  en los kuatro puntos de la tyerra...

Los ultimos tyempos, yo tenia el uzo de ir a verla kon grande frekuensa, me ambezi muncho de eya, teniamos largas konversasyones sovre varyos sujetos i avia komo un djenero de interkambyo de ideas entre mozotros...  mos akontesia de no tener syempre la mizma vizyon de las kozas, ma todas las dos mos esforsavamos de kedar avyertas a lo ke dezia la otra....

Elfi va mankar mucho a sus serkanos i a sus amigos.Ke su alma repoze en paz.