Batya Natan

Tekstos ke me azen akodrar...

Tekstos ke me azen akodrar...

Syempre ke evoko rekuerdos, digo es la vez de alkavo, no me kedo mas kavdal!! (sermaye) en mi memorya i ya eskapi de azer viajes al pasado. Akontese un fakto, syento o meldo una koza, aydeee otruna vez una ola de rekuerdos... Artikolos en Şalom del 24 Febrero, me yevaron a los presipyos de los anyos 50. El teksto de Estreya S. Vali lo meldi dos vezes para bien persivirlo. Aki dizimoz “ kayer el jeton”! Orozamente me kayo presto!. La Sra. Vali esta avlando de la famiya de su marido, de las kuatro ermanas, donde las tres eran las tantes, la una syendo la esfuegra de E.Vali. En en el anyo 1952 konosi muy byen esta mishpaha, las ermanas, los ijos i los sovrinos. 

Tuvimos relasyones mas ke amikal, espesyalmente kon la una de las ermanas syendo ke eramos haveres de negosyo. No kero entrar en detalyos. El “chark” de la vida esta aboltando i malorozamente, estamos  pyedrendo todos los amigos i keridos unos a unos. Despues de aver meldado su teksto, bushki Estreya Vali, eksprimi mi dezeo de konosermos de serka. Esto supozando, tenemos muncho de kontarmos ...

En la pajna 4, tekstos, sinyados Silvyo Ovadya i Ester Yannier tratan  sovre las bienfezensyas del kupl Fortüne i Izak Pinhas. No es primera vez ke Şalom eskrive por eyos. El otro anyo, muestra amiga Nelly Barokas en su artikolo diziya: “I.Pinhas merkader bivyendo en Israel va azer una eskola de 32 klasas en Çorlu, ande meldo asta la 3.klasa. Elevos menesterezos seran apoyados por la Fondasyon Pinhas...” El byervo Çorlu me travo la atansyon. Ayi nasyo, se engrandesyo mi padre i bivyeron un tyempo kon mi madre. En mi karta d’identitad tengo Çorlu komo lugar de nasimiento. En chika no lo konosi, syendo ke mis paryentes emigraron a Estambol kuando era yo  de 4-5 mezes.

Mi grande sorpreza fue de meldar los nombres Ishak - Fortüne Pinhas. La bushki a Nelly para demandar komo pudiya enkontrarlos. No fue kismet malgrado ke los Pinhas vinyeron a Estambol unas kuantas vezes, ma syempre lo supe muy tadre. Esta vez fui mas mazaloza. No es ke los vide, porke ya estavan partyendo. Ma, a lo menos reushi a obtener sus telefon i avlimos bastante. Fortüne me aprometyo de bushkarme de Israel...

Los konosi el Sukkot 1956, myentres mi viyaje a Israel. Eran vizinos de mis djenitores, en Petah-Tikva, Rehov Rambam. Espero ke se akodran de mi, la ija de sus vizinos Azikri. No esto sigura si era akel anyo, Ishak Pinhas fue el “Hatan” i lo vijitimos. Komo dishe eran vizinos muestros i malgrado la diferensya de edad, se frekuentevan kon mis paryentes. En mis viyajes sigientes los enkontri tambien, aun ke aviyan trokado de kaza seya eyos, seya los miyos.

En mi memorya Fortüne kedo una muchacha muy linda, syempre  bien mirada malgrado ke lavorava mano kon mano kon Ishak. Se alevantavan de madrugada para irsen a la “mandra” ande aziyan produktos de leche, kezos ets.. Mi padre me kontava ke konosyo al “chiko” Ishak i su famiya en Çorlu. Kon mi kuento deve ser antes 1934...

Para darvos una idea de esta famiya filantropa, vos kero deshar kon los propozitos del Sr. Pinhas: “ Esto pagando una devda kedada de mi chikez. Syempre aparti para ayudar, 1 lira de las 6 liras ke gani. D. me dyo mas muncho. Estamos orozos de ayudar en la mezura de muestra posivilidad. En 1939, en ayudo a las viktimas del terrivle seismo de Erzincan, yo no tuve afilu los 3 groshes ke estavan arrekojyendo en mi eskola. Agora vine a la sivdad ande   nasi para pagar mi devda de 3 groshes en azyendo esta eskola...”

D. les va dar muncho bueno a estas personas de grande korason.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
534