Batya Natan

UN ANİVERSARYO...i el 8 MARSO

UN ANİVERSARYO...i el  8 MARSO

Antes 2-3 semanas ampesi este teksto, komo uzo en kada 8 Marso, sovre la Mujer sus problemas i derechos. Muestra amiga Klara Perahya en pasadas abordo este sujeto, un poko de manera diferente. Es muy normal ke va aver asemejansas entre muestras konsepsyones. Jeneralmente mos akordamos en la manera de konsever faktos. Portanto, devo atorgar ke Klara tiene un senso profundo de “filozofiya” i “djuzgamiento” ke yo nunka podriya alkansar...

Presipyo de Marso selebramos el aniversaryo de “El Amaneser”. Oganyo estamos ampesando a muestro 6. anyo. Kon una oroza koensidensya, en el 8 del Marso se selebra tambien el “Diya İnternasyonal de los Derechos de la Mujer”. Los tekstos miyos se referaron en  jeneral a las aktividades de 8 Marso en el mundo i en muestro pais... Kualos son estos derechos ke se avlan tanto? En rezume puedemos definirlos komo  derechos  asigurando a la Mujer  igualidad kon el Ombre en todos los domenos de la vida komuna i kollektiva. Son derechos fundamentales akordados i legalmente protejados por organizasyones internasyonalas.

Munchas mujeres en diversas partes del mundo reusheron a obtenerlos. Egzakto, munchas ma no todas. La igualidad teorikamente parese egzistir, no se esta vyendo syempre en la pratika. En syertas profesyones ay apartamiento de ombre a mujer... Nombrozas dependen de sus famiyas o sus maridos, es el ombre ke dize el byervo final. Es un sujeto bastante ancho, kon munchas fachas, difisil de analizar en espasyo limitado.

Par kontra, komo dishimos, estamos vyendo, en munchas partes del mundo la Mujer kumplio grande evolusyon en diversos terenos profesyonal. En la Administrasyon, Politika, Medikeriya, en la Media vizual i eskrita ets... Este tablo pozitivo mos glorifika i mos da grande plazer. Yo eskarvi par azardo, unos kuantos numeros de muestra revista. Remarki  una mayoriya de sinyaturas femininas. Esta konstatasyon puede no tener grande importansa para syertos. Ma para mi eksprime la evolusyon de la “Mujer Djudia” en jeneral, i de la “Mujer Sefaradi” en partikolar, partisipando al adelantamiento de muestro Siglo. Es un chiko egzempyo ke me vino al tino otomatikamente. Por siguro no es posivle de enumerar todas las mujeres valorozas de la Diaspora i de aki, las ke estan partisipando a la “Misyon” de propajar la Kultura Sefaradi ets.. Naturalmente la emansipasyon de la Mujer Djudia no es limitada kon esto solo.

Lavorar.. derecho fundamental de la Mujer ke kere tomar parte en las karyeras ke nombrimos mas arriva. Esta reushendo en munchas profesyones ke eran supozadas ser en el monopolyo de los ombres. Una ija ke izo altos estudyos kere lavorar, por munchas razones importantes. Antes de todo kere  valorizar sus anyos de estudyo. Kere ser tambien i madre al lado de ser profesyonala. Ser konjunta, ser madre i tener una karyera... Siguro es su derecho.

Ma, estos son tambien rolos ke syempre no se estan akordando muy fasilmente uno kon otro. Par konsekuensa, la Mujer munchas vezes esta azyendo grande esforso para topar el ekilibro, rezolver el problema o mas egzaktamente, este dilemna: karyera o kriatura? Una kazada de tres anyos, me tiene dicho: “Me esto sintyendo komo aprezada entre planear mi karyera i ser madre. Todos los dos son muy importante para mi. Ma, entervalo, esto vyendo ke esta pujando la tansion  en mi unyon, kreando una atmosfera de stres.”

Es el dilemno de munchas mansevas ke keren ser “super” en todo. Asigun mi no deven bushkar a ser “perfektas”, i deven achetar de tener chikas mankuras... Organizarsen de manera a apartar (afuera del echo) tyempo para el “kupl”, para eyas i la famiya. No es fasil, ya lo se. En las entrevistas para un empyego, la kestyon: “Pensash tener kriatura?” es un “andikap” para la manseva. Porke es el indisyo de la opozisyon de los patrones a una empyegada kon kriatura (s). Ma, esto no deve romper el koraje de las futuras madres...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
555