Los evenementos primordiales de muestra vida

Şeli GAON Judeo-Espanyol
11 Kasım 2009 Çarşamba

En los ultimos dyes dias; tuve la okazyon de asistir, a una boda, brit-milla, bar-mitsva i funerales.

Estos evenementos son una partida de la sirkulasyon de la vida (hayatın akışı). Las tradisyones djudias son la baza de bivir i kontinuar la vida sovre las reglas (kaide).

 Kuando ya se dyo el “Gemer de Boda” (düğün kararı); los aparejos de la novya kon el novyo ya ampesan. Komo todos los mansevos estan lavorando muy duro en esta jenerasyon i no tienen tiempo; son las madres ke ampesan a korrer para ke todo se realize de una manera perfekta.

El ashugar, el kazamiento en la meri (nikah), la kaza ande van a morar; kale ke se moble (döşemek), kon un dekorator konosido i famozo.

Los mobles (mobilya), el fostan de novya, las invitasyones, la organizasyon del otel, los fostanes de las madres todo kale ke este arreglado .

İ kuando ya se eskapo todo, la boda se realiza kon muncha alegria, i felisidad (mutluluk).

Yo penso ke ; para una madre i un padre; la boda de sus kriyaturas es el dia el mas orozo de sus vidas.

Despues es la paridura, engrandeser a los kriyos, i viene el tiempo de la brit-milla.

La brit-milla tiene una emportansa espesyal; siendo el sembol del Djudaizmo. Es el akordo (anlaşma) ke el Dyo akumpliso (yapmak)  kon Avram Avinu.

Los mizmos aparejos se azen para esta fyesta; para ke la kriyatura seyga venturozo i de buena ogura.

El ijo ya se engrandesyo, i ya ez el tiempo de la Bar-Mitsva. En primero se aze en el dia de Sefer; la orasyon del tefillin. Para fyestar este dia emportante, ke el ijo de 13 anyos, ya echo un paso para azerse un ombre; la famiya kon los amigos komen un dulse.

Lo emportante es de fyestar la bar-mitsva; en dia de Shabat kon las orasyones apropriadas. Shabat ke es la malka, la reyna de todas las fyestas.

Fyestar este evenemento en dia de Shabat es sakro (kutsal).

Un haham ampesa a edukar (yetiştirmek)  de antes un anyo al mansevo; a meldar en ebreo, para pueder ambezarle las orasyones. Es un lavoro ke demanda muncho sakrifisyo (özveri) por las dos partes.

En enterval; las invitasyones, los fostanes, los kostumes, los chapeos, el otel, las rozas, las kandelas, los ornamyentos (süs) de las mezas, del salon del otel, la muzika, las fotografias, i el video todo se apareja kon muncha ahadu.

Fina el dia de la bar-mitsva ay kozas de azer i de korrer djusto komo una boda.

Enfin; ya vino shabat, la famiya  kon una emosyon grande  se va al kal. Todos bien vistidos ampesan a vinir a poko a poko. La sinagoga se inche de munchos envitados. Los paryentes deven de bivir este dia inolvidavle, kon muncha alegria.

El manseviko aze la orasyon kon la bozizika emosyonada, beza las manos de su padre, de su madre i paryentes i todos le oguran una buena shans i reushitad en la vida.

İ la nochada pasa kon alegria i bien reushida. Todos alegres, todos kontentes i se eskapa komo una konsejika.

A la fin; alhad ultimo asisti a los funerales de la madre de una amiga intima de la eskola.

La djentorya era koza de ver. Mizmo ke estava muy hazina i aedada, los ke keriyan azer onor a la ija, al yerno i a los inyetos incheron el simeteryo.

Malorosamente la persona nase, se engrandese, fonda una famiya, i a sus buenos anyos desha la buena vida. Esto es la realitad de la vida.

Un Dia muevo va naser,

El Sol briyando, el Syelo klaro,

İ la Vida va kontinuar  ansi...