Si...la destruksyon de la pared de Berlin (ay de esto 20 anyos) no reprezenta solo un simbolo de libertad, ma es tambyen la prova ke todo es posivle.
En las tinyevlas las mas oskuras de la noche se puede envezes topar chikos rayos de luz, la mas parte imperseptivles, ma ke pueden devenir el punto de partensya de muevos arrelumbramyentos.
Ay de esto 20 anyos, aunke en la atmosfera jeneral se sentia varios movimyentos de un dezeo de renovelamyento , ninguno puedia preveer la iminensya del derrokio de esta pared ke a eya sola materyalizava la inimistad i la deskonfiansa.
Unos kuantos ombres de fuerte voluntad lo kijeron i al perikolo de sus propya vida lo izyeron.
Aparte la muerte, no ay situasyones irremedyavlemente negativas , munchos problemas ke paresen insoluvles tyenen sus punto de avyertura ke muestros ojos empanyados de egosentrizmo no parvyenen immedyatamente a atinar.
Es ke todos los litijyos pudyeron ser reglados? Por seguro no, ma el potensyal de una real reunifikasyon es en este momento prezente, i esto no es poko. Kale deshar a los anyos, el tyempo indispensavle para topar los puntos de enkuentro...