“Mi nombre es Dr. Mirela Sidere, yo so jinekologa i moro en Ashkalon”

Muestro grande Amigo Profesor Dr. Haim Vidal Sephiha me mando kon e-mail el teksto en lingua franseza de una letra  muy interesante mandada al djuzgo Golstone, de la parte de una viktima de las roketas del Hamas. Traduzi los pasajes los mas importantes afin de komunikarlos a muestros lektores.

Klara PERAHYA Judeo-Espanyol
28 Ekim 2009 Çarşamba

Djuzgo Goldstone,

 En el mez de djulyo me yamatesh para testigar, yo vos konti mi historya. Yo so konosida de la parte de mis hazinos  entre los kualos munchos son de Gaza. Para mi kada humano es igual.. El 14 del mez de Mayo 2008 mi vida troko por syempre. Yo lavorava en mi klinika kuando en supito la fragua fue golpeada por un misil travado de Gaza. Personalmene hui terrivlemente ferida, avia sangre en kada lugar. La hazina de la kuala me okupava  fue de mezmo ferida i munchos otros lo fueron tambyen..Al mez vinyente me azeran una ochena (8na) operasyon.

Djuzgo Goldstone vos konti sinseramente mi historya en sus mas chikos detalyos. Me responditesh ansi: “Vuestro testigo es esensyal para la bushkida de los faktos”.

Djuzgo Goldstone, deke  inyoratesh mi historya en vuestro raporto de 500 ojas? Mi nombre fue solo mensyonado en un chiko lugar del konteksto tekniko. Me syento humilyada. Deke solo 2 pajinas sovre las viktimas Israelyanas komo mi ke sufren desde 8 anyos por kavzo de estas roketas?

Deke vos enfohatesh solo sovre el periodo ande mi payis fue ovligado de reaktar, i no sovre los asaltos ke provokaron esta gerra?

Deke no me dizitesh ke vuestra komisyon ya avia  de antes, djuzgado  Israel kulpavle, en su sesyon del mez de Enero i ke  los myembros  avian sinyado letras publikas a este sujeto?

Djugo Goldstone, vozotros mizmo sinyatesh una letra dizyendo ke estavash shokado sovre Gaza. Ma ande estavash kuando Gaza bombardo mi klinika ? lo ke es una violasyon del Derecho Internasyonal i de las Leyes Humanitaryas.

Ande estava vuestra komisyon? Deke kedatesh kompletamente mudo?.