Mas de una milyarda de personas en estado de ambrera

Klara PERAHYA Judeo-Espanyol
21 Ekim 2009 Çarşamba

Segun el ultimo raporto de la FAO (Adjensia de la ONU, kargada de la alimentasyon i de la agrikultura en el mundo)”Mas de una milyarda de personas son amenazadas por la ambrera”

Las rejyones las mas tokadas son partikularmente los payizes Afrikanos ke se topan a proksimidad del dezyerto, los Aziatikos ke dan sovre el Oseano Pasifiko, syertos estados de la Amerika Latina i del Oriente Medyo, i komo syempre los sitizanos los mas proves de kualkyer otro payis.

Un sejen de la populasyon del mundo bive en estado de ekstrema mizerya. Mujeres, ombres i ninyos, el estomago kaji vazio, espandidos sin fuersa ni esperansa sovre vyejas kamastras, koryen el reziko de dezapareser por falta de bastante alimentasyon; i esto a la epoka de la Deklarasyon de los Derechos del Ombre i de los grandes deskuvrimyentos syentifikos, de los kompyutadores i de la nanoteknolojia.

La ambrera fue, desde la antikuidad, el kompanyero el mas fidel del ombre, constantemente a su lado, implakavle en su enkaminamyento i en su lavoro de destruksyon, komo una fatalidad kaji imposivle a venser.

Syempre la mizma kestyon “Es ke es realmente una fatalidad?”

Por seguro ke el klimato del lugar ande estos desmazalados nasyeron, la tyerra yena de arrena, la penuria de agua, los varios kataklizmos naturales: tempestas, inondasyones, terremotos ke son frekuentes en varias rejyones, djugan un rolo preponderante i son faktores negativos muy difisil a venser.

No se puede nyegar ke a esto se adjunta una mankansa de real esforso de la parte del puevlo fizikamente i moralmente akavado por la malnutrisyon i el dezespero, asta pedrer la konsensya de sus derechos... i de otra vanda, un largo periodo de indiferensya i mizmo de oportunizmo de la parte de las grandes potensyas mundyales ke se kontentaron en el pasado de raras intervensyones para realsar el nivel edukativo del puevlo.

Se adjunta tambyen la terrivle karestia aktual de los produktos de alimentasyon de baza, ansi ke (faktor ainda mas grave) una progresyon demografika insesante, de leshos superyora a las posibilidades de nutrisyon del payiz, lo ke rende el futuro ainda mas prekaryo..

Es una koza para un kapo de famiya de tener la responsabilidad de 2 o 3 bokas a artar i otra koza de ser en karga de 9 o 10 kreaturas.

Otra koza tambyen para el i la madre de aparejar los ijos i ijas a una vida de lavoro produktivo i de kombate kontra las inevitavles vesisitudas de la vida, segun ke la famiya es de 5 o de 12 personas.

Segun los kalkolos echos por la ONU, en el anyo 2050 la populasyon mundyal va pasar de 6,8 milyardas a 9,1 milyardas. Ke sera entonses la situasyon de las rejyones en estado de dependensya ekonomika i la reaksyon de los payizes nombrados “desvelopados”?

Solo un esforso komun , al nivel individual komo tambyen mundyal, i sovre todo un movimyento kolektivo de solidaridad puedran responder a esta terrivle kestyon.