Batya Natan

Muestras valores tradisyonalas -4

Kontinuando kon muestras tradisyones mensyonaremos la “Tsedaka”, ke es una preskripsyon de la Ley, una “Mitzva”. Aki transferando su simple definisyon ke tomi de la “Halila”, puedemos dizir ansi: “ Sedaka” es la solidaridad entre los miembros de una Komunidad para el apoyo i ayudo del menesterozo”. Kuando dizimos sedaka, antes de todo pensamos: dar ayudo materyal al ke tyene menester. Kon tyempo me rendi kuento ke no es tan simple...

Desde la “Antiguedad”, komo todas las “Mitzvot” ke konserna el Judaizmo, i la Tsedaka tyene sus raizes, sus manaderos en la Tora. Ansi meldamos: “Kuando vas azer la rekolta en tu pais, desharas un kanton de tu kampo sin rekoltar i no arrekojeras lo ke kedo de los granos por rekoltar... Abandonaras esto para el prove i el estranyero..” (Vayikra19: 9-10).

Estamos vyendo ke pratikar la “Tsedaka” es un dover, una ovligasyon emperyoza de la Ley. Un buen Djudio no deve abstenerse de apoyar en alguna manera, el ke le solisita un ayudo. El menesterozo tyene el derecho a esta solisitasyon. İ el ke responde tyene un merito en kumpliendo una “Mitzva”, un akto importante de piadad. Muestros savyos dizen ke: “...el ke aze una tala Mitzva, deve rekonosensya al prove ke le dyo la oportunidad de kumplir este akto de bienfezensya.”

Sin tener alguna ovligasyon espesifika, el Djudio tyene i otros doveres. Akumplirlos prokura satisfaksyon moral, repozo de alma i de konsensya. Entre otros: vijitar de vez en kuando los aedados, los ke nessitan kudyo medikal... Ayudar ijas menesterozas en sus aparejos de kazamiento ets... A mi opinyon, lo mas importante es el kudyo kontinual a los djenitores ...

Komo dishimos mas arriva, la Tsedaka tyene sus manaderos en la Tora. En estos todos aktos, el prinsipyo jeneral se nombra: “Gemilut Hassadim” ke, en simple traduksyon sinyifika azer aktos de bienfezensya. Ma, en realidad esto es muncho mas. Gemilut Hassadim en la Historia del Judaismo syempre eksprimo la pratika de la “Tsedaka “ en todas sus formas. Aki kero dar una sitasyon, no me esto akodrando ande la meldi.

“En el Judaizmo no es posivle de interpretar un kualkyer teksto o una simple tradisyon relijyoza, sin el ayudo de la Lektura Talmudika. Ansi, el presepto de “Tsedaka” se topa implisitamente en la vida egzemplarya de los Patriarkas...” El ke pratika espesyalmente la Tsedaka, es un “Tsadik”, un “Djusto”...

Una importante tradisyon relijyoza testigando muestra grande konviksyon en el Poder Divino, es la “Mezuza”. Tenemos la firma kreensa ke eya mos guadra i guadra muestras moradas de todo modo de malisyas i malores. Salyendo de kaza i entrando, uzamos bezar la “Mezuza”. Es la promesa de segir en el kamino de D. Es tambien una rekuesta de reushita para la realizasyon de todo lo ke mos entremetemos a azer. Los preseptos de la Tora mos indikan i mos rekomendan de tener syempre prezente en muestro korason el Amor de D.  i inkulkarlo a muetros ijos. (DevarimVI-6:9) (XI- 12:20).

Aki unos,kuantos byervos sovre la nosyon “ Neder”, tenyendo un lugar importante en muestras Tradisyones Relijyozas. En la “Tora” ay seryozos avertisimyentos konsernando “Neder” non kumplido: “Si te abstyenes de azer un “Neder” no kometes pekado. Ma, observaras i akumpliras lo ke salira de tus lavyos, el “Neder” ke azeras kon tu veluntad al Eternal i ke tu boka pronunsyara...” (Devarim 23: 22-23) (Bamidbar 30: 3).

Muestros savyos dizen: “Por el tyempo ke tus palavras estan aryento de tu boka, sos sus senyor. Proferandolas, devyenes sus esklavo. No prometeremos lo ke no puedemos realizar...” Ay en vezes reel impedimientos deshando la persona en estado de no pueder akumplir el “Neder”. Se puede tomar konsjo i ayudo de un otorizado para una solusyon.

Keridos amigos, kon estos kuatro tekstos perkuri a dar syertas nosyones ke todos konosemos. Espero toparmos en serka kon las Tradisyones Folklorikas.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
475