|
Ay kestyones a las kualas es muy difisil de responder ...kavzos ambivalentes ke yevan en eyos dos verdades kontraryas, laskualas se kontredizen la una la otra.... En este momento uno de entre eyos esta rebolteando la opinyon jeneral Evropea komo parsyalmente la Amerikana i , kuala ke sea la solusyon , eya deshara syempre un pasto de seniza amarga, mizmo en la boka de los ke triunfaran. Se trata del kavzo “Roman Polanski”, grande sineasto, kreador de ovras inkontestablemente de grande valor, ma ke 33 anyos antes, a la edad de mas de kuarenta anyos , tuvo relasyones seksuales kon una adolesente, despues de aver bevido i azer bever a su kompanyera, una syerta kuantidad de shampanya, a la segida de una seans de fotografia.. Komo mo lo dize un dokumento de la epoka, publikado la semana pasada por el kotidyano elektroniko Fransez “Le Figaro”, el avia sido arrestado poko despues su delito, sovre la denunsyasyon de la famiya de la viktima i inkarserado sovre baza de una sentensya juridika relativamente severa. No se avlo a ningun momente de violasyon, ni de violensa sovre la viktima, ma simplemente de relasyones seksuales de un ombre maduro kon una muchachika de manko de 18 anyos. Se deve tambyen notar ke poko despues, a la segida de una traktasyon monetarya, la famiya de la viktima retiro su kesha, lo ke probablemente permetyo la liberasyon temporarya del akuzado i le permtyo de fuir de los Estados Unidas para refujyarse en Ingleterya i tambyen en Fransya de lakuala tyene aktualmente la nasyonalidad. Ansi, el bivyo libre durante 33 anyos sin entrompeso de sirkular en el espasyo Evropeo i de realizar kreasyones sinematografikas de muy alta kualidad .... el tenia mizmo un domisilyo en Suisa ande iva kon grande frekuensa sin ninguna aprehensyon . Ma la semana pasada, kombidado al Festival sinametografijko de Zurich para resivir un premyo ke le fue atribuido, el fue arrestado a su salida del aeroplan ,en prezensya mizmo del ministro de la kultura del payiz ke se topava aya djustamente para resivirlo. Oy en dia, Roman Polanski se topa enserrado en una prizyon Helvetika , para ser retornado a los Estados Unidos ande su ekstradisyon (suçlu iadesi).es reklamada. Este kavzo devino aktualmente el sujeto de una syerta polemika, al seno mizmo de grupos de amigos. Inkontestavlemente el delito era grave i ninguno, ken ke sea “Ombre de estado” ,” intelektual” o “artisto” de ke importansa ke sea, puede konsiderarse mas arriva ke la Justisya i sus leyes. Ma es una koza de azer pagar una falta immedyatamente despues de su akontesimyento i totalmente differente despues de 33 anyos kuando la persona inkulpada ayego a la edad de 78 anyos, kon un pasado ulteryor al delito relativamente regolar. Dos otras kozas deshan pensativles: El dezistimyento de la kesha de la parte del partido ke la introduzyo, a la segida de una traktasyon monetarya ... I tambyen, el orden de arresto de la Suisa, despues de aver inivitado el akulpado a asistir al dicho Festival de Zurich, en el objektivo de remeterle un premyo. No se trata en niguna manera de un kualkyer dezeo de diskulpar el akuzado, ma de un syerto sentimyento de malestar jeneral, una ezitasyon, puedeser mizmo un dubyo.... justifikado o no. No savemos lo ke sera la sentensya del djuzgo Amerikano, ma kuala ke sea, eya deshara inevitavlemente (komo lo dishe mas arriva) un pasto de seniza amarga en la boka de los ke sigyeron la evolusyon de este kavzo. |
