Ansi va el mundo

Klara PERAHYA Judeo-Espanyol
24 Haziran 2009 Çarşamba

La libertad de ekspresyon es por seguro la afirmasyon la mas fuerte de la libertad de un puevlo i en mizmo tyempo el instrumento el mas util para la evolusyon de su payis.

Desde unos kuantos dias, el tema mayor de la prensa oksidental es, byen entendido, la fuerte opozisyon de la manseves Iranyana kontra un rejimen inkontestavlemente totalitaryo.

No savemos asta kuando va turar esta protesta, ni konesemos el potensyal de persuasyon ke eya kontyene. En todo kavzo este fenomeno yeva en el mizmo una immensa esperansa para todos los ke, de serka o de leshos, aspiran a  una posibilidad de “djustisya” i de “igualidad entre sitizanos”.

La represyon de este movimyento de kontestasyon parese ser bastante brutal, munchos muertos i <al dezir de varios gazeteros> multiples personas arrestadas, de las kualas no ay ninguna novedad.

El kotidyano Fransez “Le Monde” del 20/6 mos transmetyo la opinyon de unos kuantos intelektuales Iranyanos ke biven afuera de sus payis de nasimyento. Ansi el filozofo “Ramin Jahanbegloo”, profesor de universidad en Toronto-Kanada, dize:

“... la kriza Iranyana es ideolojika ansi ke jenerasyonal i tyene sus raizes en la konfrontasyon entre ‘el ardyente dezeo de demokratizasyon de la manseves’ i ‘la reaksyon konservativa del aktual governo’, ma es improbable ke eya puedra venser la voluntad del governo.

Dos persepyones diferentes de la vida, dos vizyones opozadas del sistema de governansa; en todo kavzo, el Iran se topa aktualmente en una kriza de lejitimidad sin presedente en su historya politika”

(fin de sitasyon)

Kual ke sera el rezultado de esta konfrontasyon, el solo fakto ke una partida del puevlo se opoza a un sistema konsiderado ser oppresivo, es a el solo ‘la afirmasyon de la dinyidad de este puevlo i tambyen un indisyo de su evolusyon’.

Es ke esto puedra modifikar la aktual manera de governansa del payis? Es ke esto puedra tener una influensa sovre sus relasyones kon su entorno? imposible de responder.