Las karakteristikas del puevlo Djudyo

Klara PERAHYA Judeo-Espanyol
17 Haziran 2009 Çarşamba

El ombre es ansi echo, variavle, diferente segun las sirkunstansyas, pronto a amar komo tambyen a aborreser,  puede ser naturalmente bueno ma korrumpido durante su egzistensya por las multiples tentasyones ke lo entornan i los falsos dezeos ke el no parvyene syempre a dominar.

Munchas vezes amargado por mankansa de kompresyon, enfuresido por las injustisyas i mizmo por las simples difikultades ke entrompensen su kamino, el va en la vida, kuando derecho el braso tendido, kuando kosheando...

Portanto kaji syempre  (errensya ansestral del pasado)  kada puevlo prezenta varios “invariavles” ke lo apartan de los otros.... kada puevlo  tyene sus karaktreristikas ke lo desferensyan de los otros.

El puevlo djudyo tambyen tyene las suyas kaji invariavles, kualas pozitivas kualas  negativas, las kualas le vyenen de un pasado dolorozo i kontribuan puede ser a krear su destino  prezente  komo futuro.

Munchas vezes seheludo, ma tambyen en syertas sirkunstansyas orgolyozo sin razon... seryo, i en mizmo tyempo yeno de humor... jeneralmente prekosyonozo todo en syendo seguro de si mizmo...  inkontestavlemente universalisto aunke igualmente  egosentriko, el djudyo (malgrado sus variasyones de kondukta) keda kaji syempre el mizmo.

Vyernes pasado me paso por la mano el livro de proverbyos ke, 14 anyos antes, kon unas kuantas amigas, aviamos rekojido, traduzido en 3 linguas i komentado.  

Aviamos klasifikado estos proverbyos segun sus diferentes sinyifikasyones, bushkando ansi  a traves eyos la manera de pensar de muestros avuelos, sus opinyon sovre algunos sujetos, sus humor munchas vezes amarga, sus revolta delantre un destino dolorozo, komo tambyen a syertos momentos sus sometimyento a la voluntad divina...Pokas kozas trokaron malgrado la evolusyon  del tyempo... munchas vezes las mizmas reaksyones, i en sus ideas, kaji los mizmos konseptos en varios kampos de refleksyon.

Personalmente (absente por tres semanas para enkontrar mis ijas i ijo) pensi  revenir sovre unos kuantos de los refranes ke mos desharon muestros avuelos, refranes  ke afirman  realmente las karakteristikas del puevlo djudyo i ke vos seran prezentados de vez en kuando, de una manera irregolar.

Empesaremos por una karakteristika pozitiva de muestro  puevlo:

 “Aksyon i dinamizmo”.

El dinamizmo fue syempre uno de los grandes faktores ke aseguraron la sovrebivyensa del puevlo djudyo i ansi uno de los grandes prinsipyos de su manera de bivir. Muestros antepasados se embezaron desde sus chika edad a apoyarsen unikamente sovre eyos mizmos, sovre sus solo potensyal de enerjia i sovre todo a no desharsen arrestar delantre ningun entrompyeso; 

Eyos, desde los primeros tyempos, avian entendido la importansa de sus propya voluntad i la valor de sus propyos esforsos afin de prezervar sus independensya i sus dinyidad:

“Sigun va el djudyo, lo ayuda el Dyo”, “Vende pipinos, vende halva i no asperes de nedeva”, “ desha de komer i no de azer”, “ “ningun lavoro te dezonora, ma te provecha i te onora”, “al ke anda, el Dyo le manda”,  “el kavod es del ke lo aze”, “el muncho durmir es una vida sin bivir”, “kada ombre es patron de su mazal”, “el tyempo pedrido i los santos lo yoran”, ets..ets..

 

(kontinuara)