Tengo la sertitud ke munchos lektores del Şalom ya estan al koryente del grande debate ke reboltea en este momento la opinyon no solo de los djudyos ma tambyen de una multitud de otras personas byen pensantes, konsernando la atribusyon del posto de Direktor jeneral de la grande Institusyon ‘’Unesco’’ a Farouk Hosny, ministro Ejipsyano de la kultura, el kual tyene pronunsyado en el pasado palavras terrivlemente negativas kontra Israel.
Muestro grande amigo el Prof.Haim Vidal Sephiha me mando por e-mail la kopya de una eskrita de protestasyon a este sujeto, sinyada por tres grandes intelektuales djudyos: “Elie Wiesel”, “Bernard Henri Levy” i “Claude Lanzman”, en lakuala eyos sitan varias palavras pronunsyadas en varias sirkunstansyas por el kandidato Farouk Hosny, komo por egzempyo su deklarasyon en el anyo 2001 ke “Israel no kontribuo nunka a la sivilizasyon, a kualkyer epoka ke sea, porke la sola koza ke el izo es de apropyarse el byen de los otros” itambye ke: “la kultura Israelyana es una kultura inhumana, agresiva, rasista i pretensyoza ke repoza sovre el prinsipyo de rovar lo ke no le apartyene i mizmo de apropyarselo.
En el anyo 2008 el disho mizmo: “... si ay ainda en muestras bibliotekas livros Israelyanos, yo mizmo los vo kemar, delantre vuestros ojos” ets... ets...
Son palavras sinyifikativas ke por seguro diskreditan la persona ke las formulo i meten en dubyo su kompetensya a dirijir un organizmo de una semejante dimensyon, el kual deve antes de todo ser objektivo i syempre imperativamente imparsyal.
A este propozito, segun lo ke eskrivyo Myerkoles pasado 27/5/2009 el kotidyano elektroniko Fransez “Le Monde”, Farouk Hosny sintyo probablemente la nesesidads de azer una deklarasyon eksplikativa.
El disho:“Desidi de prezentarme a la eleksyon ke dezinyara el futuro “Direktor jeneral de la institusyon UNESCO...mi kandidatura ya resivyo desde agora el apoyo de la Liga Araba, de la Unyon Afrikana i de la Organizasyon de la Konferansya Islamika, ma varios payizes kontestan su lejitimidad en pretekstando syertas palavras ke tengo pronunsyado en el pasado....Si, lo aksepto, me akontesyo de ekspresar mi indinyasyon delantre la sufriensa de los palestinyanos, de un puevlo privado de su tyerra i de sus derechos, no kije menospresyar ninguno....Puede ser ke los byervos ke utilizi paresen ser muy duros, kale meterlos en el konteksto de esta trajedia....yo so desde multiples anyos ministro del governo de un payis ke izo la paz kon Israel i ke se esforsa sin kansarse de azer valorizar el dialogo i no la violensa.
Yo so un ombre de paz, ya se ke la paz pasa por la kompresyon i el respekto. Kero revenir sovre las palavras ke pronunsyi en el mez de Mayo 2008 i ke fueron konsideradas komo una insitasyon a kemar livros eskritos en Ebreo, estos byervos shokaron... lo entyendo.
Kero dezir ke regreto estas palavras, eyas son kontraryas a todo a lo kualo yo kreo, kontraryas a lo ke so...nada es mas kontraryo a mi manera de pensar ke el rasizmo, la negasyon del otro o la voluntad de prejudisyar la kultura djudia i kualkyer otra kultura” (fin de sitasyon)
İ komo syempre una kestyon me vyene al tino, komo syempre una pregunta sin repuesta: Al pareser sin ser egzaktamente una verdadera mea culpa, Farouk Hosny ekspreso frankamente su regreto de aver pronunsyado syertas palavras desplazyentes. Eske una semejante persona puede toparse a la kavesera de una İnstitusyon ke tyene komo primer objetivo:” el dialogo entre las kulturas”, “la komprensyon i el respekto del otro” , ansi ke “la erradikasyon de todo modo de prejudisyo rasyal o relijyozo”? Eske aktos o palavras pronuynsyadas en sirkunstansyas espesyales bastan a kondanar definitivamente una persona?
