El Papa akavo su pelerinaje en Tyerra Sante

Vyernes tomo fin el periplo papal en Tyerra Santa ... periplo difisil, yeno de entrompyesos para el Shefe de la Eglisya Katolika, rezultado dubyozo para el puevlo djudyo

Klara PERAHYA Judeo-Espanyol
20 Mayıs 2009 Çarşamba

Su primera vijita en Israel fue konsakrada  al Yad Vashem, alto lugar de evokasyon de lo ke fue la desgrasya del  krimen nazi i de la indisible dolor de un puevlo entonses sin real refujyo, entregado a la krueldad inhumana de un rejimen sin fey ni konsensya.

Al dezir de los İsraelyanos, este primer kontakto kon lo ke fue realmente la sufriensa djudia, no parese aver muncho esmovido  el Prelato Katoliko.

Si, el se inkorvo... Si, en su diskorso  perfektamente byen  planifikado, el pronunsyo  la chika fraze ke ya devino kaji protokolarya “No mos olvidaremos nunka de la Shoah”, ma esto no abasto a  tokar realmente la asistensya djudia.

Meldi en la prensa ke Rav Israel Meir Lau, Prezidente de Yad Vashem disho. “En este primer diskorso, el Papa  no avlo del masakro perpetrado por la Almanya, el no dyo el mas chiko sinyo mostrando ke partaja muestra dolor, el no pronunsyo a ningun momento el shifro ‘6 mliyones’ “

Se asperava otra koza , muncho mas emosyon de la parte del  Shefe de la Eglisya Katolika,  palavras fuertes, palavras ke ivan puede-ser  markar profundamente las relasyones entre las dos  relijyones monoteistas.

Prealablamente ferido en su rekuerdo i en su dinyidad por la partisipasyon papal al proyeto de beatifikasyon del Papa Pie XII, el kual (komo  fue notifyado en muestra rubrika “Novedades” de la semana pasada) no avia ni protestado avyertamente ni  intervenido  durante la segunda gerra mundyal para luchar kontra el terrivle jenosidyo de 6 milyones de djudyos... profundamente ferido tambyen por la reabilitasyon del prelato negasyonisto Inglez Richard Williamson ke nyego la amplor del holokosto, el puevlo Israelyano tenia la esperansa de oir palavras reparatrisas,  kondanasyon publika de la injustisya i la barbaria ke milyones de inosentes  tuvyeron a soportar, en la indiferensya de un entorno oportunisto.

Por kontra en su  diskorso de partensya, el Papa  dyo sinyos de muncho mas emosyon i sovre todo de kompasyon kon la sufriensa de las viktimas de la Shoa.

El gran Rabbinot de Fransya  Gilles Berheim  estima de su parte ke “la vijita del Papa en Israel kedara un buen  enkontro mizmo si palavras mankaron... ningun yero de su parte, si no syertos silensyos”.

Shimon Perez el manifesto visivlemente  su satisfaksyon por el segundo diskorso.

Benyamin Netanyahu ke tuvo kon el grande Prelato Katoliko  una entrevista de 10 minutos, puertas serradas, deklaro  su kontentez de konstatar kel Papa  partaja su inkyetud konsernando el potensyel nuklearyo del Iran, el kual konstitue un immenso peligro para su entorno.