Batya Natan

Lo ke me aze akodrar Lag Baomer...

Lo ke me aze akodrar Lag Baomer...

Omer... sigundo diya de Pesah, ofrenda al Templo Sakro, de la primera rekolta de sevada (arpa).. Se empesa a kontar el Omer, komandamiento de la Tora. La “Sefirat ha Omer” de 49 diyas se termina el 6 Sivan, kon la fyesta de Shavuot, diya ke el puevlo ebraiko arresivyo la Tora en el Monte Sinay. Esto fue una chika dokumentasyon ke konosemos todos. Me yevo de muevo a los anyos de mi chikez, evokando kon nostaljiya, los byervos Omer, Sefira i Lag Baomer. Byervos ke eran para mi, komo un rompekavesa (bilmece).

En los anyos 40, biviamos kon mis avuelos paternal en muestra kaza de Galata. Mi Nono (de b.m) kontava el Omer i me diziya: “Mira Coya, oy es el 3er, o el 10en.. ets.. diya del Omer.” Me eksplikava kozas ke no pudiya entender kon mis 7-8 anyos... İ yo, enganchada en mi idea ke Omer era un personaje, le demandava: “ Papu, kuando va vinir este Omer!!?”... Ma mi kerido Nono no se deskorajo de mi inkompetensa i kontinuo a dotrinarme kon pasensya.

Yo teniya otrun byervo en mi vokabularyo, “Sefira”... Mi kerida madre (de b.m) engrandesida en Tekirdağ, en el seno de una famiya tradisyonalista, konservo los uzos de su manseves. Es muy natural ke me inkulkariya syertos, si no todos... Dunke, me ambezi ke Sefira era sinonimo! de defensa de lavrar (brodar), de kuzir, ets... apenas ke aparesiyan las estreyas.

“Lag Baomer”, era una enigma para mi. Un byervo tan hadrozo! deviya ser una fyesta, ma no viya en kaza dingun siman de festividad... Paso anyos, myentres los viyajes ke ize a Israel, vide los fuegos, las festividades de Lag Baomer, i pude realizar kompletamente su Historia. En uno de estos viyajes, el kalendaryo mostrando el 18 İyar, el 33er diya de la “Sefirat ha Omer”, mos fuimos al Monte Meiron, serka Safed. Ayi se topan las tombas de Rabi Shimon Bar Yohay i su ijo Rabi Eliezer. Asigun lo ke meldi, myentres las persekusyones Romanas, eyos kedaron eskondidos en una grota durante 13 anyos.

El famozo Tanna Bar Yohay murio el 33er diya del Omer. Desho de sava ke su muerte no fuera kavza de dolyo, ma motivo de festividad. En Lag Baomer, los adeptos de la Kabala realizan en Meiron selebrasyones. En todo Israel se fyesta kon ekskursyones, kompetisyones esportivas. Asigun una leyenda, al murir de Shimon Bar Yohay, su kaza se incho de una luz i un fuego ke turaron todo el diya.

El 18 İyar, el konsepto de las selebrasyones nokturnas se ve en las “fogatas” (chikos fuegos) ke se asyenden en todo el pais. En Meiron las selebrasyones tyenen un karakter muncho mas egzaltado. Durante la noche se bayla, se kanta kantes kompozados a la onor de Bar Yohay, se asyende “fogatas”. Keridos lektores, estos fuegos, estos bayles i kantes, tuvimos la okazyon de bivirlos i mozotros antes munchos anyos. Pasimos la nochada entera en el Monte Meiron. Fue alora ke entendi kompletamente la sinyifikasyon de Lag Baomer, ke entonses no kedo komo una enigma para mi...

Alhad es el “Diya de la Madre”. Estos versos miyos los kero dedikar a todas las madres:

 

KADA SEZON EN Mİ KORASON

Tu estas en mis diyas, en mis sezones, / Para tan kererte ay munchas razones. / Sos tan alegre komo la Primavera, / İ, en mi korason syempre primera. / Sos el sol briyando del Enverano, / Leshos de ti, me syento guerfano. / Kuando sos triste komo el Otonyo, / Tu melankoliya aze i a mi danyo. / Kualo devo dezir por el İnvyerno? / Ke sos yelada!?, esto no lo puedo. / Tu estas en kada una de mi sezon, / Tu, madre miya, i en mi korason...    

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
421