Alargamyento de tyempo de aparejo akordado a Netanyahu

Aunke (kon el partido de Avigdor Lieberman i los dos chikos de la derecha relijyoza) su governo ya esta kaji pronto a asumir los echos del payis, Binyamin  Netanyahu demando a Peres un alargamyento suplementaryo de tyempo  antes de deklarar ofisyalmente  las kompozantes de su ekipo

Desde el empesijo de sus traktasyones, se vido ke es kon  la mas parte de las diferentes fuersas politikas de su payis,  ke el kere formar su kabineto. Al pareser, su objetivo  es de krear sino un konsensus jeneral, lo ke es byen entendido  kaji imposivle, ma a lo manko un  kampo de debate franko sin konsesyones otomatikamente akordas, ni  tambyen sin un esprito de opozisyon sistematika.

Komo lo vimos la semana pasada, Livni refuzo kategorikamente una kolavorasyon sin akordo prealable al sujeto de la kreasyon de un Estado Palestinyano totalmente independyente i la persiga del proseso de paz de Annapoli... De su parte,Netanyahu propoza  la otonomia para el puevlo Palestinyano kon un fuerte ayudo ekonomiko.

Las dos tezis son byen entendido diferentes, ma no de una manera irreduktivle...Diskusyones en el seno de un mezmo governo sin inimistad puedran aserkar los dos puntos de vista...

El solo fakto de apartener al mizmo grupo de lavoro kon la mizma karga de responsabilidad i el solo objetivo de asegurar la paz i la seguridad de Israel eliminara el antagonizmo ke egziste entre eyos. No se tratara entonses de rivalidad individual, ma de defender kada uno su punto de vista, i munchas muevas ideas puedran surjir de un kambyo amigavle de refleksyones.

Komo lo  disho el selebre filozofo Fransez: “del golpe de ideas nase la luz.

En un  esprito enteramente diferente i kon egzijensyas difisilmente akseptavles, Avigdor Lieberman  no es tambyem  irreduktivlement opozado a la kreasyon de un Estado Palestinyano enteramente independyente, a la kondisyon espesyal de no derrokar las kolonias Israelyanas.fraguadas en Sisjordania.

Es ke esto va ayudar a rezolver el konflikto entre los dos puevlos vizinos? Los dias avlaran, munchos faktores entran en  djugo...En todo kavzo no puedemos nyegar ke Netanyahou manifesta una insesante voluntad de formar un  governo ke  reflektara lo mas posivle la opinyon del puevlo.

Es realmente sorprendente komo un ombre de estado puede trokar de personalidad i de manera de ver las kozas, segun su pozisyon... El ke se topa en la opozisyon es por seguro mas vendikativo, mas kategoriko en sus afirmasyones i sus egzijensyas, la pelea es su arma la mas fuerte, ma una vez  a la kavesa del governo, la responsabilidad desvelopa refleksos diferentes a la sigida de una analiz mas minusyoza de kualkyer situasyon, i de una refleksyon muncho mas profunda.

Un ombre de estado deve ir mas leshos ke su  propya persepsyon de las kozas, mas aya ke su sola opinyon, mas aya sovre todo ke su propyo orgolyo.

Despues del refuzo kaji kategoriko  de Tzipi Livni de kolavorar kon el, Benyamin Netanyahu se torna agora verso Barak, el kual tyene difikultades a konvenser su partido de la nesesidad de un governo de koalisyon kompuesto de opinyones diferentes .

Reunidos al torno de una mizma meza sin prejuisyos, a la luz  de argumentos defendidos por los dos  partidos, las kozas tyenen la oportunidad de ganar en klaredar.

En este momento, ande problemas de una importansa vital estan sovre el punto de ser diskutidos, una atmosfera de byenkerensya i de voluntad de kompresyon resiproka puedra por seguro ayudar a topar el kamino el mejor.

 

P.S.: Martes 23 del mez koryente la prensa Israelyana anunsya la konkluzyon de un akordo de kolavorasyon entre Netanyahu i Barak, malgrado las retisensyas i la deskontentes de una partida del partido travayisto