Terrivles reprezalyas a la sigida del orden de arresto pronunsyado por la Korte Penal Internasyonal kontra el prezidente del Sudan “Omar El Bechir”
En repuesta al orden de arresto pronunsyado kontra el prezidente “Omar El Bechir“ por la Korte Penal İnternasyonala, el governo del Sudan tomo la desizyon de ekspulsar immedyatamente numerozas Organizasyones no governomentales (ONG) muy performantes, lo ke riska de meter en perikolo miles i miles de ombres, mujeres i ninyos desplasados a la sigida de konfliktos tribales i ke en este momento se topan en la prekaridad la mas absoluta.
En kavzo de kontestasyon, los diplomatos estranjeros seran eyos tambyen ovligados de salir del payis.
Kon la partensya forsada de las organizasyones karitativas, se aspera en poko tyempo una terrivle rekrudesensya de epidemias i muertes (partikularmente de ninyos), falta de komanya, agua de bever i sovre todo de materyal sanitaryo i medikos adekuados.... drama interminavle de poveretos arrankados a sus lugar de nasimyento i entragados a la voluntad kriminal de un terrivle rejimen diktatoryal.
Desde anyos, estos desmazalados ya biven en kondisyones de vida primitivas, debasho de tendas… egzistensya mas ke mizeravle , sin ayudo ni kudyo i prinsipalmente sin esperansa de mijoria.
I aktualmente muevas reprezalyas salvajes deshan el mundo perplekso i lo meten delantre un dolorozo dilemo kaji insoluvle…“No kondenar aktos de real jenosidyo“ es avrir el kamino a possibilidades de muevos kavzos semejantes …de otra parte (en el kavzo prezente) permeter la ekspulsyon de “ONG“s es riskar de deshar multitudes de kriansas umanas facha kon facha kon sus destino trajiko, en perikolo de muerte, lo ke por seguro es tambyen inakseptavle.
La kondenasyon publika de ‘’Omar El Bechir’’ era inkontestavlemente nesesarya …el kastigo no es solo una mezura punitiva ni por deltodo un simple djesto de vengansa… lo mas importante en el, es su fuersa de disuasyon...el da a la lucha kontra el krimen una konsistensya kaji konkretra i ansi el fakto keda de ser una simple entidad abstrakta.
Una kondenasyon supoza un procheso (lo ke fue echo), una diskusyon inevitavle entre myembros responsavles de un tribunal i ansi un interkambyo de argumentos , kada uno kon su pezgo de refleksyon, lo ke (a muestro torno) mos ovliga a pensar.
Ke sera la reperkusyon de los evenementos prezentes sovre el futuro?… es ke muestra epoka sera konsiderada komo una epoka oskura , un retorno al oskurantizmo medyeval o byen una epoka de tranzisyon ande todo parese mesklarse i ande se chaptean (asta kerer destruirsen los unos los otros) los konseptos los mas luminozos kontra las ideas las mas retrogrades?
Ke sera la opinyon de la posteridad sovre el kavzo prezente? Ken lo puedra dezir? depende por seguro de los kriteryos sovre los kualos eya sera bazada.
