Batya Natan

Syertas Informasyones -1

Syertas Informasyones -1

No topi un titolo mas konveniente (uygun) para el teksto ke me esto propozando de eskrivir oy. En realidad no estava en mi program, porke ya paso unos, kuantos mezes desde el evenimiento. Portanto penso ke es un sujeto ke no pyedre su aktualidad. En aparejando mi artikolo para “El Amaneser” del mez de Marso, en supeto desidi de ampesar a eskrivir estas linyas. Se trata en todo kavzo del sujeto ke va dar i a muestra revista, “Las Sinagogas de Turkiya”. Estas linyas pueden ser konsideradas komo una manera de akdama (önsöz-giriş).

Por siguro ke el lektor ya tuvo okazyones de konoser detalyos sovre las dos ekspozisyones ke tuvyeron lugar el mez de Oktobre... Dos diferentes lavoros importantes, ma tratanto la mizma tema. Esto pensando ke en “El Amaneser” va avlar mas muncho del lavoro komun (ortak) de Naim Güleryüz i İzzet Keribar. Mas egzaktamente penso relatar en ancho, los komentaryos de un famozo istoryano turko, bien konosido de muestra Komunidad.

Oy va dedikar (ithaf etmek, ona ayırmak) este teksto ekskluzivamente al lavoro de Joel A. Zack: “The Historic Synagogues of Turkey”. Me parese ko no se eskrivyo muncho en muestra prensa de este lavoro kompuesto de fotografiyas ekspozadas en el Palasyo Topkapı, i del album / livro dando eksplikasyones anchas sovre las Sinagogas. Un livro bastante instruktivo (eğitici) de Joel Zack, djuntos kon  las fotografiyas de Devon Jarvis.

Ken es Joel A. Zack?... Arkitekto amerikano i autor del livro “Synagogues of Morocco”. Diplomado de la Universidad de Virginia, izo el master en la Universidad de Columbia. La teza ke se eskojo fue : Bushkidades sovre las Sinagogas de Marocco, Romania, İndia i Turkiya. En desparte fue tambien uno de los pionaryos (öncü) en la restorasyon de la Sinagoga de Marocco.

El proyekto de Joel Zack es komo testimonyo (tanıklık) istoriko de una Komunidad Djudia ke bivyo en las tyerras Turkas desde la Era Romana, Bizantina... Tambien i de los djudios ke toparon refujyo (barınak) en estas mizmas tyerras despues ke fueron ekspulsados de la Espanya i del Portugal... En la introduksyon (giriş) de su livro, Joel A.Zack esta dizyendo: “...Desde un tyempo leshano, fraguas de orasyon (Sinagogas) chikas o grandes, simples o monumentalas (abidevi) enrikesyeron en fakto, munchas sivdades en  el poderozo (güçlü) İmperyo Otomano. Komo fue de mizmo mas despues en las tyerras de la Republika Turka...”

Asigun el Sr. Zack, entre estas Sinagogas, nombrozas fueron abandonadas i desparesyeron sin deshar para las arshivas, algunas trasas de sus egzistensyas. Otras Sinagogas fueron adaptadas a diferentes okupasyones. Syertas, aun ke se topan en un terreno presyozo, estan serka de kayer en ruvinas (harabe). Aktualmente, unas Sinagogas en estado de reparasyon, estan kontinuando a dar sus servisios relijyozoz a las Komunidades Djudias lokalas. Estan kontinuando komo lo izyeron durante siglos, malgrado el shifro amenguado (eksilmiş) de kreentes (mümin), a la segida de emigrasyones en el korso de los d’alkavo 50 anyos...    

(a kontinuar)

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
517