Kerer oir… Saver oir

Klara PERAHYA Judeo-Espanyol
11 Şubat 2009 Çarşamba

“Los Estados unidos keren oir el resto del mundo” mos dize la prensa internasyonal.

 Es un fakto irrefutavle ke, malgrado la lamentavle situasyon de su ekonomia, el Governo Amerikano kedo syempre la mas grande potensya del mundo, por la sola razon ke el supo salir de las limitas de su sola maner de pensar.

 Kale akseptar igualmente ke su puevlo mayoritaryamente de kuero blanko supo venser su orgolyo i meter a su kavesa un ombre de kuero bruno, de madre katolika i de padre muzulmano. Esto fue una de las mas grandes viktoryas sovre si mizmo de un payis ke malgrado su kontinual esforso de kedar syempre multi-kultural i multi- kultual, no tuvo en el pasado, asta la ultima eleksyon lejislativa, el koraje de realizar enteramente este dezeo.

En retorno, uno de los puntos los mas karakteristikos de este Ombre ke la populasyon Amerikana eskojo libremente, es de ser avyerto a kualkyer persona, kuala sea su orijen… de kerer oir i konoser los argumentos de los otros i sovre todo de kerer avlar ansi ke diskutir i no solo diktar.

No mos olvidaremos ke “la kriansa umana” no es echa unikamente de su kodigo jenetiko, ma tambyen de todo lo ke los otros le dyeron i le dan, de todo lo ke eya resive i de todo lo ke eya mizma da… un troke de kada dia ke asegura la evolusyon de su manera de ver las kozas ke no puede kedar enserrada entre kuatro paredes i nesesita espasyo i movimyento para desveloparse, komo un mekanizmo de insesente renovelamyento.

En su primer diskorso diplomatiko, Joe Biden, Vice prezidente de los Estados Unidos, kargado de las relasyones politikas Amerikanas kon los payizes estranjeros, deklaro ke la mueva administrasyon de Washington sera diferente de la presedente i va utilizar el dialogo, “Eya va oir i konsultar”.

El disho: “La Amerika tyene menester del resto del mundo todo komo el resto del mundo tyene menester de la Amerika”.

 No manko tambyen de adjuntar lo sigyente; “durante los ultimos anyos uvo malorozamente un peligrozo aleshamyento en las relasyones entre la Amerika i la Rusia, el momento vino de apoyar sovre el boton de un muevo renovelamyento de kolavorasyon en los kampos de aktividad ande los dos payizes pueden i deven lavorar endjunto.”

 El Vice Prezidente Amerikano deklaro esto, todo en tomando la prekosyon de avizar ke varios dezakordos subsistaran ainda; ke la Amerika no va rekonoser la independensya de la Abkhazia i de la Ossetia i ke igualmente eya kontinuara a desvelopar la defensa antimisil, uno de los mas grandes motivos de konflikto entre las dos grandes potensyas.

Joe Biden afirmo por kontra ke los Estados Unidos no praktikaran en ninguna sirkunstansya la tortura, porke ningun payis mizmo el mas poderozo no deve luchar solo kontra el terrorizmo.

En retorno, el demando el ayudo internasyonal afin ke Barack Obama pueda serrar lo mas presto posivle la prizyon de Guantanamo. ‘’En la lucha kontra el terrorizmo devemos kooperar kon los otros payizes i vamos tener menester de vuestra partisipasyon.’’

Es ke el plano trasado por Obama i sus kolavoradores puedra ser realizado en su totalida? esto los anyos vinyentes lo diran. Una sola koza es realmente konkreta : sus esforsos aktuales, loskualos presto o tadre empesaran a dar fruto, komo “la serradura del kampo de Guantanamo”, “la limitasyon de las mezadas egzorbidentes de los direktores de las grandes firmas”, “el retorno a una kolavorasyon sana kon otros payizes”, “la bushkida de relasyones diplomatikas kon estados asta agora konsiderados kaji enemigos”, “la frankeza i la sinseridad kon las kualas el prezidente de la mas grande potensya mundyal admetyo su responsabilidad en la falta de aver engajado una persona inadekuada a la kavesa del projeto de desvelopamyento del sistema sanitaryo, el kual es en este momento, uno de los mas importantes en el kampo sosyal”, ets…ets…

Ke el Dyo i los ombres lo ayuden!