Un ombre de byenfesensya de muestra komunitad se desparesyo
Un ombre de kultura, un byenfetor, una persona de armoniya, un buen komersante, buen marido i buen padre, mos desho la buena vida.
Ke este en ganeden; Lazar ABUAF, nasyo en Ortaköy en 1927, ande paso su chikes i su manseves.
Despues ke se kazo kon su mujer Fani; kontinuo a bivir aya, fina la paridura de la primera ija, i se paso en 1953 a Şişhane.
El lavoro en su magazen en Tünel; ande vendiyan guantes de kuero, chapeyos i esharpas. Era un merkader reushido. Despues de unos kuantos anyos, avyo kon sus ermanos endjuntos el magazen konosido por todos “Bakara”.
En Bakara vendiyan; kristales, porselenes i todo modo de vidrerias.
Teniya una enerjiya sin fin, en todo modo de punto de vista.
A la fin de los evenementos ke uvo en 6-7 Eylul 1955, le rompyeron los vidros (cam) de las vitrinas del magazen entero.
El se demoralizo i se kijo iiyir del pais.
Ma; sus amigos komersantes, komo lo konosiyan ke era un buen merkader reushido kon su sezudeza (aklıselim), su intuisyon (sağduyu), i su saverisyo; no lo desharon, i en el anyo 1965 el avyo el magazen “EVİN” en Pera.
Este magazen “EVİN” era komo el empisijo, el kueshko (çekirdek), el korason de los sentros de empleos (alışveriş merkezi), de oy. Kon su kapachitad i lavoro, reusho i lavoro 25 anyos aki kon sus ermanos.
En primero vendiyan; merseria (tuhafiye), despues vidreria, todo lo ke vyene al tino, los menesteres de una kaza. Lampas de kristal, takumes de komer de porselen, vazos de kristal, vidreria, merseria i vistimyentas de kriyaturas.
El kontenido (kapsam) era muy ancho. Un magazen de 3 – 4 etajes, muy bien ordenado, todo lo ke se bushkava se topava.
En el anyo 1983; el fue retretado despues de un desrepozo ke paso. Keriya kontinuar a lavorar, ma su famiya no lo desho.
Komo era una persona muy aktiva; entro a lazilo de vyejos (İhtiyarlar Yurdu) komo volontaryo.
Era amado por todos, se okupava de los vyejos kon grande kerensya, los yevava a komer i a kaminar kada 15 dias. El kantava, el baylava i los alegrava. Era una persona muy adjideozo (merhametli) i se okupava de todos los problemes ke teniyan.
Fina antes tres anyos, ke le vino esta hazinura maldicha, se fue al azilo kon grande dezeo, i final dia de alkavo no peryo la veluntad de bivir, porke teniya la kreensya en el Dyo puederoso, ke se va azer bueno.
Era un padre i un granpapa atado a su famiya, un ombre de ekilibro.
Lavoro 23 anyos en el azilo, de alma i de korason.
Era el egzempio de la modestiya, de la semplisitad, rezolvava (sonuçlandırmak) los problemes sin mostrarse.
Estamos muy tristes, de peryer a un personaje presyozo komo el.
Ke su alma repoze en ganeden.
Pasensya a su mujer, i a su kerida famiya.
