Kipur dia de perdonansya i tambyen de interogasyon

Klara PERAHYA Judeo-Espanyol
15 Ekim 2008 Çarşamba

Kipur, dia konsakrado no solo al ayuno ...dia no solo de orasyon i implorasyones, ni solo de buenas intisyones ke se realizaran o no... Kippur dia de repentensya, dia sovre todo de interogasyon  en un interminavle debate de mozotros kon mozotros...dia de akseptasyon de muestras responsabilidades, ande mos sentimos desnudos delantre muestra konsyensya,  facha kon facha kon una fuersa ke parese dominarmos.

Kipur, dia de aislamyento en el tumulto mizmo de un entorno echo de fachas ke mos paresian ser konosidas sin nunka demandarmos lo ke sus aparensya mos eskondian, dia de kuestyones a las kualas savemos no pueder nunka topar una repuesta.

Momentos de djuzgamyento de mozotros para mozotros, komo una bushkida sin fin del senso de kada koza, de la sinyifikasyon real de la vida, de la razon de  muestra prezensya o del objetivo de muestra destinasyon,  momentos de soledad i de dubyo, lado kon lado kon el terrivle temor de una fin inevitavle.

Una sola sertitud, ken ke seamos (poderozos o flakos, rikos o proves):"la posibilidad de pueder azer un akto o un djesto ke deshara una trasa detras de muestro pasaje"  , "transmeter", "dar,a ke nivel ke sea,  i a ken ke sea" ...simplemente "dar sin nada asperar en retorno"..."dar la kayentor de una sonriza , el afalago de una palavra dulse, una mano avyert a kualkyer ombre ke sea ke se topa en el apreto"

"Dar sin asperar resivir" Esto es ,al pareser, muestra sola sinyifikasyon ...i mizmo  puede ser muestra sola possibilidad de infinito.