Noche de alhad (Şabat a la noche) tuve la okazyon de oir integralmente sovre un posto de la televizyon Franseza, los dikorsos de "Barack Obama" i de su muevo kompanyero de ekipo "Joe Biden".
La impresyon ke produzyeron sovre mi fue ekstraordinarya, dos ombres fuertes, de orijen sosyal modesta, serka del puevlo i de sus menesteres primordiales ...dos entidades umanas por seguro diferentes la una de la otra, ma ke se kompletan .
El uno karismatiko, aedado solo de 40/45 anyos, enerjiko i impetuozo en su dezeo de azer trokar la facha aktual de la Amerika, todo en syendo konsyente de todo lo ke le manka... i por seguro de su ineksperyensa en politika estranjera.
El otro, tambyen karismatiko i impetuozo, briyante i muy persuazivo en el kampo de las relasyones eksteryores del payis, riko de una eksperyensa de 35 anyos de prezensya en el Senato Amerikano, durante los kualos el pudo afirmarse kon grande brio.
Entre los dos, al pareser, una sinseridad total ke pusha kada uno de entre eyos a rekoneser frankamente en el otro todo lo ke puede ser les manka ainda individualmente
En todo kavzo, un ekipo avyerto a todos los problemas, yeno de ideas muevas i sovre todo de voluntad de venser.
