La ventana de vuestra ermana

Şeli GAON Judeo-Espanyol
6 Ağustos 2008 Çarşamba

La kerensya i los 50 anyos

Esta semana estuvimos envitados a la selebrasyon de 50 anyos de un amigo kerido.

Una nochada muy reushida, aviya kaji 45 personas.

Sus keridos, madre, padre, ija, ijo, su famiya chika i unos kuantos amigos, mas ke amigos aliados (dost) komo mozotros ocho kuples.

En una guerta de una pansyon en Polonezköy, mos resivyeron toda la famiya kon muncho guste. El komer, la musika, nada no mankava.

Despues de komer, su ija, ijo i su mujer izyeron una avla kurta, a la fin los amigos avlaron por el, i mizmo eskrivyeron una poezia endikando (belirtmek) su karakter i la kerensya ke tyenen por el.

Baylimos, kantimos i pasimos un tyempo agradavle.

Lo emportante aki es ke kero avlar del amigable, de la amistad entre 14 personas.

Esta nochada era i el aniversaryo de muestra konosensya ke nasyo antes 16 anyos en un viyaje a İsrael.

Mos konosiyamos ma no eramos entimos. Despues de una semana de estar endjuntos noche i diya, una amistad komo ermandad nasyo entre mozotros, i kontinuo fina oy.

Esta ermandad ke vyene de aryento del korason es emportante; porke entre los anyos i los problemes ke tenemos todos, las relasyones kontinuaron.

Mizmo ke mos estamos renkontrando de vez en kuando, la kerensya i la unyon entre todos mozotros esta kontinuando i va kontinuar syempre.

Si la persona kere byen al den frente, lo konsidera komo amigo u aliado, lo aksepta kon todas sus kualidades.

No puedemos kerer byen a la famiya. Nasimos en una komunitad i vimos ke tenemos madre, padre, ermanos i los otros paryentes.

Bivimos en esta komunitad en keryendolos byen.

Komo puedemos eskojer las personas ke van a ser muestros aliados entre todos los amigos ?

Kualo es la amistad (dostluk) ?

La amistad es un sentimyento (his), es una amor ke se forma de parte a parte.

Los aliados son dos u tres personas en la vida.

El aliado se keda kayado, yora u se riye kon mozotros endjuntos. El es la persona ke mos emosyonamos kuando mos vyene al tino, ke mos eskarinyamos kuando no lo vemos.

La vida es ermoza kuando se partaja.

La kerensya puja kuando se partaja. Kale saver la valor del amigable; para no peryerla kale azer todo lo ke puedemos.

El amigable es partajar la tristeza; la alegriya i la felisidad (mutluluk) sin enselarse.

Kualo aze la kerensya i la amistad ?

Me esto akodrando de un artikolo ke meldi en el sujeto de la KERENSYA.

Dos buchukes (ikizkardeş) ke nasyeron sin kompletar (tamamlamak) los mueve mezes, los ataron a dos makinas diferentes para azerlos bivir i se vido ke uno de eyos no teniya la shans de bivir.

La enfirmyera ke se estava okupando de los bebes, sin tomar en konsiderasyon las reglas del ospital; los ato a la mizma makina, ke no teniya derecho de azer este fakto.

Kuando estuvyeron endjuntos el bebiko ke estava sano; le echo el braso en el dorredor de la garganta de su ermaniko i lo tomo kon amistad a su lado.

Despues de este fakto; el korason del bebe ke estava flako empeso a lavorar kon regula (düzenli) i la temperatura (ısı) del puerpo (vücut) se normalizo.

Nunka no neglijaremos (ihmal etmek) de abrasar a todos los keridos, amigos, paryentes, ermanos, ermanas, visinos i a todos los umanos .....