Batya Natan

24 JULİO 1944... RHODES

24 JULİO 1944... RHODES

Los lektores del “Şalom” konosen byen el nombre Selahattin Ülkümen, Konsül Turko de Rhodes los anyos 1943-44. Al koste de la vida de su famiya, salvo  42 djudios de la mano nazista. Tengo su livro otobiografiko kon su propia otografa. Tuve la okazyon de konoserlo un poko, par el intermediaryo de Va..., una serkante suya ke es mi amiga. Partyendo de lo ke syento de eya, i de lo ke meldo, realizi este artikolo. Va...me konto en 1990, el viaje de  Israel, por la seremoniya istorika en Yad Vashem,  ande el Ex Konsül  fue dezinyado i onorado komo “Righteous Among the Nations”.

“...Desde el presipyo del Febrero 1944, los aviones alemanos estavan bolando de serka sovre muestro techo kon un bruido  terrivle... 18 Febrero 1944 Shabat... verso las oras 14.00 sinti las sirenas de alarma. En supeto una grande eksplozyon i sigiendo, nuves imensas de polvo... La pacha syedra miya aryento de sangre... Echi un ojo al derredor, el edifisyo de mi Konsolato no egzistiya entonses... En esto, vide entre las ruvinas, mi mujer i la ayudante, manos i figuras invizivles de sangre, apoyadas una a la otra, kon graves  firidas ...”(1*)           Ampesi kon los propozitos del defunto Sr.Ülkümen, tomados de su lavoro otobiografiko. En 19 Julio 1944 el Komandante aleman de Rhodes, anunsyo un dekreto ordenando a todos los ombres djudios de arrekojersen en ... Despues de aver tomado todos los dokumentos de estos djudios, los aprezaron sin dinguna eksplikasyon. İvan a ser por un tyempo provizoryo transferados a Atena, asigun lo ke les disheron!!...

Los malorozos estavan dayinda inkonsyentes de la prekaridad de sus kondisyones. Portanto una persona entendyo muy byen la sinyifikasyon de este “viaje”. Selahattin Ülkümen saviya ke no iva ser provizoryo, ma el “ultimo viaje” de kaji 2.000 djudios...

 

 

En su entrevista kon el Komandante Kleeman, protesto la arrestasyon de sujetos turkos (djudios). Su argumento era ozadiozo, ma djusto: La Republika Turka no era parte en esta gerra, era “neutre”. Ansi reusho a salvar 42 djudios del ginnam de Auschwitz... 24 Julio 1944, 1673 djudios de una Komunidad ke bivyo 4 Siglos en la İsla Rhodes, fueron embiyados al kampo de la muerte, 150 reusheron a kedar en vida....

Sintiremos  el Sr. Ülkümen: “...Pude salvar 39 barkeros turkos de ser egzekutidos, i 42 Djudios de ser embiyados a sus “ultimo viaje”. Estos kompatriotes miyos, a kada okazyon no mankan de amostrarme sus rekonosensya. Los sentimyentos de gratitud fueron  mi grande rekompensa moral de los anyos espinozos de mi vida profesyonal...”   

Todos sintimos gratitud enfrente d’un djesto semejante. Mi amiga me konto en detalyo la resepsyon del 500. anyo de la Ekspulsyon. En esta nochada del Palasyo de  Dolmabahçe, Sr. Ülkümen fue envitado d’onor i Va... lo akompanyo. Notavles de muestra Komunidad syempre tuvyeron kudyo, perkuraron de echarlo en Or- Ahayim, ande fue kurado i byen mirado. Lo vijitaron en la “Kaza de Retratados” ( Emekli Sandığı) de Etiler. Fue tambyen ayi ke lo vide i yo.

Esta “Kaza” fue su ultima morada. Muryo el 7 Junio 2003 a la edad de 89. La Komunidad Djudia de Rhodes dezeando ekspresar otruna vez su grande agradesimyento, oganyo Djugeves 24 Julio organizo una seremoniya de komemorasyon.

Selahattin Ülkümen era una persona modesta, al grado de dezir, lo ke izo el, fue solamente “sintir la boz de su konsensya”. En paz ke repoze, Amen.

   

(1*)- En el bombardamyento, muryeron dos fonksyonaryos turkos. La Sra. Mihrinisa, espoza del Sr. Ülkümen estava asperando su primer bebe. Ma, non remetida de sus firidas, muryo 6 mezes despues, dando la vida a su ijo Mehmet.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
469