A la memorya de muestro inolvidable Salamon Bicerano

Klara PERAHYA Judeo-Espanyol
31 Temmuz 2008 Perşembe

En la dulse kayentor de estos dias de enverano empapados de sensualidad i de poezia , mos es imposivle de no rememorarmos muestro eternal poeta "Salomon Bicerano", amorozo de voluptad, de ermozura i de armonia.

A la memorya del ke no esta mas entre mozotros, uno de sus poemas:

Te dare mi alma Salamon Bicerano

Por una sonriza de tus labyos rojos,

Por un rayo de sol en tus lindos ojos,

Vendo mi korason !

 

Por la belleza de tus dyentes de perla,

Por tu pyel suave i sejas en lunilya,

Vendo mi korason !

 

Por tus brasos i tus pechos d'albastro,

Por tu puerpo, ovra del Grande Maestro,

Vendo mi korason !

 

Por tu boz de kristal, joya ke m'enkanta,

Deshando me yevar al syelo ke kanta,

Vendo mi korason !

 

Ma por el myel de tus kayentes palavras

Ke hazen deritir mis penas amargas,

Te dare mi alma.