Fragmentos de la entrevista ke la revista ...

Ansi ke vo lo aviamos prometido la semana pasada, traduzimos algunos paragrafos del relato de la entrevista kon Gilles Bernheim, entonses kandidato al posto de futuro Gran’rabbino de Franstya, ke vos prezentamos debasho de estas linyas:

 

Information Juive: Ke es vuestra konsepsyon del rolo de Gran Rabbino de Fransya?

 

Gilles Bernheim: Este mandato da a la persona ke lo asume muy grandes ovligasyones. El Gran Rabbino de Fransya es antes de todo el Shefe espiritual de la Komunidad Djudia. El dirije el Rabbinato i gia la komunidad. Es la razon por la kuala el deve ser una personalidad en la kuala todos los judyos de muestro payis se sentiran reprezentados, oidos i respektados. El deve ser una referensya espiritual ke inkarna en su persona las valores morales fundamentales.

 

Inf. J.: Kualas devran ser, en los anyos vinyentes, las prinsipales misyones del Gran’Rabbino?

 

G. Bernheim: Todos los Djudyos son garantes i responsavles los unos de los otros... Devemos enrezyar la filozofia del “Judaizmo en la djenerozidad” i un sentimyento de unidad.

Una refleksyon radikal sovre la famiya es una urjensya .El judaizmo deve tener kargo de todos los problemas de la epoka aktual, ke son: “la insertidumbre konsernando el rolo del ombre i de la mujer”, “la soledad”, “los divorsyos frekuentes”,”la difikultad de edukasyon”, “el lugar de la mujer en la komunidad”, etc.....

Muevos ekilibros devran ser topados; el desmamparo de los espritos ovliga los responsables relijyozos a azer akodrar a la kolektividad los prinsipyos de fraternidad i el kudyo del byen jeneral.

El Judaizmo deve tambyen entretener un dialogo regolar, markado por el respekto mutual, no solo kon las relijyones kristyanas ma tambyen kon el Islam, i esto por multiples razones..

 

Inf. J.: Kual sera vuestro engajamyento primordyal?

 

G. Bernheim: Son numerozos, ma los mas urjentes son: el ayudo a los ermanos i ermanas ke se topan en el menester, la vejes, la enfermedad i la soledad.

La buena voluntad judia no manko nunka i esto es una buena koza, porke se trata de una egzijensya fundamental , se trata de sedaka , una akto de strikta justisya... la moneda no es todo, antes de todo kale el respekto i el kudyo.

 

Inf. J.: Ke son los proyektos ke tenesh la intisyon de desvelopar si sosh elijido Gran’Rabbino de Fransya?

G. Bernheim:  Tres son primordyales:

1) Dar a la Eskola Rabbinika los medyos de pueder ofreser a los kandidatos “una ensenyansa a la altor de sus funksyones ke son eyas multiformes”: anchas i fuertes konosensyas de la Halakha, kalifikasyon jeneral al nivel universitaryo, etc... afin ke los futures rabbinos no se syentan nunka en estado de inferyoridad delantre los ke les van demandar kuala kestyon ke sea.

2) Mirar ke los presyos del Kasherut i de las eskolas Judias no sean inaksesivles para las famiyas modestas.

3)instalar en los konsistoryos. servisyos regulares ke permetran de responder immedyatamente a los Yahides ke formularan kestyones sovre el derecho ebraiko.

 

Inf. J.: Komo rezumir el “kredo Judyo”?

 

G. Bernheim: Segun me “la derechedad”...la derechedad es la baza sovre lakuala se puede edifikar una Torah de vida rezya i duravle.