Alüminyum Hurda Geri Dönüşüm

Las yaves de la reushita

Las yaves de la reushita

“Si no ay difikultad i obstakolo en el kamino vuestro, sepash ke este kamino no vos yeva a un lugar importante...” Esta fue de George Bernard Shaw, el famozo eskrivano İrlandezo, una refleksyon ke se puede komentar de munchas maneras. Reushita, un byervo ke sintimos, a kada etapa de muestra egzistensya. Es verdad ke da konfiensa a la persona, adjusta a la vida pozitivismo. Este momento no esto pronta a dar una definisyon de la reushita. Kaminando i avlando!...

Es una konsepsyon ke difera de persona a persona, dependyendo tambyen, del objektivo ke se kere alkansar. Alora, komo lo afirmo B. Shaw, mas es duro es el kamino para alkansar al buto, mas la  satisfaksyon de aver reushido es grande. Fue una fraza un poko “sofistike” i larga. Ma, espero ke “reushi” a eksprimir mi idea. Puedemos avlar i de ambisyon. Yo penso ke a la baza de kada lavoro ay inevitavlemente una doza de ambisyon ke, en el sensyo afirmativo,  deviene un estimulante, un “dopping”. Esta ambisyon es la ekspresyon pura del dezeo de reushir, la razon de entremeterse (kalkışmak) a este lavoro, i la fuersa ke pushe el benadam. Un sentimyento ke konosko byen de mis eksperyensas...

Penso ke ay syertos kaminos, maneras de ayegar a la reushita. Todos savemos muy byen, ke sin azer esforsos konstruktivos (yapıcı), ne se alkansa a un buen rezultado. Esforso o “gayret”, komo dezimos en turko. Ma, savemos tambyen, ke los esforsos no traen syempre la reushita. Ay vezes, malgrado ke se aze todo el posivle, no se parvyene kompletamente. En un kavzo semejante, ke tengo enkontrado munchas vezes, no me deskorajo ni me dezespero. Kon mi optimismo natural! i abitual, me digo ke medya desfecha (başarısızlık) kere dezir tambyen medya reushita!. Empeso una mueva tentativa (girişim).

En primero determino mi objektivo ke puede ser un triko, un plato muevo, una traduksyon, un teksto dokumentaryo, no importa kualo... Kalkolo mis puntos pozitivos, mis puntos flakos. Puedo mizmo demandar ayudo de alguno mas kompetente. A la eksepsyon de konkorsos kontra la ora,( lo ke entonses no es mi domeno) o de un tyempo limitado, no kale apresusrerse. Los buenos rezultados se alkansan kon pasensya.

Naturalmente, kale ser mas o menos organizados. Ago a mi manera un chiko plano! Al menester ago investigasyones, bushko repuestas ke me mankan, espesyalmente kuando ago un teksto dokumenteryo o istoriko. Son en jeneral sujetos ke no perdonan los yerros. Asigun mi la primera kondisyon de “PUEDER” reushir es  tener un buto en la vida, i “KERER” reushir. Aki kero sitar una fraza ke me plaze por su mesaje, sinyada Emille Roux: “Los ke no tyenen dingun buto en la vida, no toman ni plazer en el lavoro...” 

Keridos amigos, es ke pensash ke es derecho de sentralizarse (odaklanmak) a todo koste, a la reushita? Un psikologo respondyo ansi: “No es djusto, porke la desfecha kavza deziluzyon i mizmo dezespero. La persona no deve tener una idea fiksa komo ser primer en todo domeno. Ay altas i bashas. Oy no se reushe, amanyana si. Se reushe en un domeno, i en otro no...” Dayinda se puede avlar muncho, ma no kero enfasyar el lektor.

Agora, a la luz de lo ke meldimos, puedemos dar una definisyon neta i kurta: “La reushita es parvenir a alkansar el objektivo ke la persona se fikso.” 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın