Rekrudesensya del litijyo entre las komunidades djudias Evropeas i el “Papa Benoit II”

Opezisyon de las komunidades djudias Evropeas a la ultima desizyon del “Papa Benoit II” de resivir de muevo un negasyonisto al seno de la Eglisya Katolika

Klara PERAHYA Judeo-Espanyol
4 Şubat 2009 Çarşamba

A la kestyon de un djornalisto del kotidyano le Monde al sujeto de la grande protestasyon ke formulan munchas komunidades Djudias Evropeas kontra la desizyon del Papa Benoit XVI de reabilitar un prelato negasyonisto ekskomunyado* por el Papa Paul II (de bendicha memorya), el gran Rabbino de Fransya Gilles Bernheim deklaro kel enunsyo de este fakto fue para el un golpe muy dolorozo en su kualidad de djudyo i de uno de los militantes del “Dialogo  entre las Relijyones”.

El disho:

“Nyegar la Shoah es insultar la memorya de 6 milyones de djudyos muertos en los kampos de konsentrasyon. Tuve la okazyon de oir las kondenasyones de mis amigos kristyanos, los kualos protestaron tambyen kontra esta desizyon del Vatikano.

Tengo aktualmente munchas kestyones ke kedan sin repuesta.

Komo dialogar kon ‘este otro’ ke aze de la negasyon de la Shoah una opinyon personal?

Ke se va pasar si los kuatro prelatos reabilitados kontinuan a anular las desizyones  adoptadas en 1965 por el Konsilyo Vatikan II (debasho la voluntad del Papa  Jean 23 (de bindicha memorya), desizyones ke  afirman la proksimidad Istorika entre  Djudaizmo i Kristyanizmo?” (fin de sitasyon)

Por una mejor komprensyon  de lo ke es la real sinyifikasyon de la palavra “negasyonizmo” ize una chika bushkida i topi  el kodigo sigyente ke karakteriza esta maldicha asosyasyon:

 

1) “No uvo jenosidyo i  las kamaretas de gaz ke lo simbolizan no egzistyeron nunka”.

2) “Lo ke la djente yama (solusyon final) fue simplemente la ekspulsyon de los djudyos verso el Este de la Evropa”

3) La kuantidad de viktimas djudias del nazismo es muncho mas flaka ke lo ke se dize, tanto flaka ke es klaro ke no uvo jenosidyo ni ninguna tentativa de jenosidyo de la parte de la Almanya.

4) La Almanya hitleryana no tyene la mayor responsabilidad de la Segunda Gerra mundyal. Eya partaja esta responsabilidad kon los djudyos i mizmo eya no tuvo ninguna responsabilidad deltodo.

5) El mas grande enemigo umano  durante los anyos de la gerra no es la Almanya nazi ma la Rusia de Staline i el Bolshivizmo. En todo kavzo Bolshivizmo i Djudaizmo son identikos.

6) El jenosidyo nazi es una invensyon de la propaganda de los Aliyados, prinsipalmente de los djudyos i partikularmente de los Sionistos, los kualos dan  shifros imajinaryos afin de tener un provecho finansaryo. (fin de sitasyon)

 

Ansi es el kredo del “negasyonizmo”, mentirozo, absurdo, akto de immensa indjustisya enverso el rekuerdo de los ke muryeron en la detresa moral i la sufriensa fizika. El es un akto muncho mas grave ke un asasinato, el es la negasyon de los grandes preseptos divinos.

 

Si, el negasyonizmo sinyifika el renyegamyento de la muerte de milyones de  personas en sus  kualidad de kriansas del Dyo ı en sus dinyidad de “ser humanos”.

 

El negasyonizmo es la profanasyon de la memorya de ombres, mujere i ninyos  ke fueron matados sin ningun motivo valivle, sovre baza de teorias inumanas ke kualkyer esprito sano no puedra nunka entender.

 

El eskopo del kodigo negasyonisto es de renyegar el derecho a la vida de milyones de desmazalados i ansi riska de aparejar dias eskuros para la umanidad entera ke se topa en un esforso de fraguar un mundo rejido por la etika i el respekto del otro.