El anyo 2009

Şeli GAON Judeo-Espanyol
14 Ocak 2009 Çarşamba

Kada anyada mueva traye kon eya; muevas esperansas, muevos atakos (atılım), muevas deskuvyertas (buluş), muevas reushitades i muevos adelantamyentos (ilerleme) en todo modo de espasyo.

Mozotros, las personas kale ke lavoremos mas muncho, para reushir mas muncho i para ser mas produktivos.

El mundo entero arisivyo el anyo 2009; kon muncho guste i entuzyasmo (coşku).

Kada anyo muevo ke es un presipyo (başlangıç); kontyene la emosyon, la pozitividad i de ser realistos.

En este anyo; anyada emportante porke ay una kriza ekonomika en el mundo entero, gerra en el oryente, el antisemitizmo ke pujo; lo mas emportante es de esperar la estabilidad (istikrar) en los paises.

Esto pensando ke; kale konservar la esperansa para pueder luchar kon las problemas i kontinuar a bivir.

Ser pesimisto amingua la motivasyon i la gana de bivir de la persona.

En muestro doredor; tenemos amigos , keridos, hazinos, personas ke se estan muryendo, luchando para un bokado de komer, nada no esta bueno, ma no kale demoralizarmos, kale ser fuertes para resistir a todos las difikultades. Porke la vida es una lucha (mücadele) permanente (sürekli).

Mos estamos ansyeando (kaygılanmak); por el avenir de muestra famiya; ijos, ijas, madres, padres...

La vida se izo muy difisil para todos. Mizmo ke estamos pensando ke munchas kozas no va trokar, i todo va kontinuar kon los puntos negativos; la esperansa de pensar ke despues ke se ariskurese muncho, diyas ermozos van a amaneser; mos da la fuersa de kontinuar a la vida.

Keridos lektores; İsrael esta pasando diyas ariskuros i muy difisiles. Rogaremos i esperaremos ke todo se va terminar kon pas i kon felisidad.

Kero partajar un kuento (öykü) ke me plaze i ke no me esto akodrando a ken apartyene.

Es el Kuento de las KANDELAS.

Kuatro kandelas estavan kemandosen a poko a poko. Se puediya uyir lo ke estavan avlando entre eyas, tanto el doredor estava kayado.

La primera kandela disho :

“Yo so, LA PAS (barış), ma dingunos no me esta ayudando para kemarme. Me esta paresyendo ke en serka me va amatar” i su flama se aminguo i se amato.

La sigunda kandela disho :

“Yo so, LA FİDELİDAD (vefa), ma malorosamente la djente se estan esvacheando de mi. Por esto; no ay menester ke mi flama kontinua a kemar”. Kuando termino de avlar; el ayre la amato.

La tresera kandela; kon una boz triste disho:

“Yo so, LA KERENSYA (sevgi). No tengo mas la fuersa de kemarme. Las personas se olvidaron de mi, no estan entendyendo mas mi valor. Se olvidaron mizmo de kerer byen a los mas serkanos”.

İ eya se amato. En supito; un ijiko entro a la kamareta i vido ke las tres kandelas estan amatadas.

“Deke no estaj kemando?” i empeso a yorar.

En esto la kuatrena kandela empeso a avlar.

“No te espantes chikitiko, mi flama esta kemando i puedemos asender las otras kandelas kon esta flama.

Yo so, LA ESPERANSA (umut)”.

El ijiko gustozo tomo la kandela de la esperansa, i empeso a asender una por una las otras tres kandelas.

Ke nunka la LUZ de la ESPERANSA no manke de muestra Vida!...