Ay una eksperyensa Djudia ke deve ser
mas ke syempre transmetida.
Tenemos un mensaje a los ke estan
eksperimentando las matansinas kolektivas
en la Afrika, Darfur, Chechnya, ande personas
mueren sin kuento, sin nombre, sin ninguna
sinyifikasyon... Para eyos tenemos una
eksperyensa de rezistensya.
Bernard Henri Levy Filozofo djudyo de Fransa
Mi amiga Norma Anav me mando un chiko raporto del desvelopamyento de la “Konferensya inter-relijyoza entre Imames i Rabinos” ke tuvo lugar en Paris debasho el patronaje de la UNESCO, en data del 15-17 Desembre pasado, konferensya ke (ay dos semanas) vos fue anunsyada en esta mizma pajina.
De prima vista, se puede pensar ke en estos dias ande roketas i tiros estan feryendo ninyos, mansevos i vyejos, no es el momento de avlar de una simple djunta inter-konfesyonal …
En efekto, el sujeto parese ser kaji kaduko, sovrepasado por los akontesimyentos aktuales, ma despues de aver un poko pensado tuve la konviksyon ke djustamente es en estos dias ke kale azerlo, mizmo si esto puede pareser inoportuno …
Una semejante konferensya no es una simple ekspozisyon de argumentos ke kada uno de los partisipantes defende…Una semejante konferensya es kaji un empesijo de dialogo ke ovliga a oir lo kel otro dize i demanda un esforso de komprensyon afin de salir de su sola manera de pensar...
Es ke eya tuvo un rezultado realmente pozitivo ke sera de un kualker provecho para krear en el futuro un verdadero dialogo, el kual permetra ombres ke pusharon sus revendikasyones de identidad asta el grado de aborresimyento, a akseptar si no una situasyon de karinyo ma a lo manko de respekto? No se puede nada afirmar, ma todo es mijor ke este odyo persistyente, ke esta suspisyon resiproka al nivel del puevlo... todo es mijor ke este refuzo mutual los unos de los otros...
No es en la ravya ke puedra naser la verdadera paz, ni en la rankor ni tambyen en el espanto, la afrisyon o byen la ambre, ma solo en la akseptasyon de un dialogo… El sera un empesijo de umanizmo en su senso el mas absoluto…
De kualo se trato en esta konferensya del 15-17 Desembro 2008?
El tema prinsipal era la « Sakralidad de la Paz ». Munchos partisipantes ekspresaron sus inkyetud al sujeto de la absensya de progreso en el adelantamyento de esta prosedura i kaji todos kayeron de akordo ke los dirijentes relijyozos tenian un rolo presizo a asumir afin de favorizar un ambiente favoravle en este kampo..
Munchas deklarasyones fueron echas konsernando el terrorizmo i la inkapasidad de los payizes Arabos a topar una solusyon al problema de los refujyados , en kontraste kon la kestyon de los refujyados djusyos ke venian de los payizes Arabos i ke fue rezolvida por Israel.
Enfin, i esto es muy importante, uvo un akordo unanimo para kondenar todo modo de violensa perpetrada al nombre de la relijyon.
El rezultado puede pareser flako… ma el kontyene una esperansa, la esperansa de desakralizar el terrorizmo i de restituirle su verdadera dimensyon de brutalidad i salvajeria.