Simone Veil elejida myembro de la Akademia Franseza

Klara PERAHYA Judeo-Espanyol
26 Kasım 2008 Çarşamba

Marka de grande estima i de profunda konsiderasyon  por  la kualidad de su lavoro, Simone Veil fue resivida al seno de una de las mas prestijyozas İnstitusyones  Fransezas i  puedeser tambyen mundyales.

En este momento, eya figura entre los kuarenta immortales de la Akademia  Franseza , no solo por algunos de los livros muy byen eskritos ke eya publiko ma por la totalidad de su karrera de mujer ke lucho, desde los anyos leshanos de su adolesensya,  por  la igualidad de derechos entre mujeres i ombres, por el respekto del ser umano (de ke orijen  ke sea) ansi ke  por el respekto de la memorya de muestros ermanos  eksterminados  salvajemente durante el nazizmo

Eya tenia 16 anyos kuando fue embiada kon su padre, madre , ermano i ermanas al kampo de la muerte de Aushwitz de ande sus  jenitores komo su ermano no  salyeron nunka.

 A su retorno  en Fransya, su payis de nasimyento, reskapada  del  inferno  de Aushwitz,  ma ferrida por syempre en su  sensivilidad, Simone Veil kijo  avlar, kontar  la sufriensa de los ke fueron krualmente eksterminados, ma se topo  facha kon facha kon  un mundo ke no keria oir... ke no keria saver....

Por segura no era indiferensya de la parte de las personas ke no avian bivido la mizma trajedia, ma puede ser el  menester viseral de salir de la horror ke eyos  avian sentido  de leshos en el espanto i la angusya... puede ser tambyen una syerta inkredulidad , el refuzo instinktivo  de un universo vazio de  sinyifikasyon i  ke aviya pedrido no solo su espiritualidad, ma tambyen su dinyidad de umano..

Si, uvo un terrivle silensyo despues el retorno de los raros sovrebivyentes de los kampos de konsentrasyon, un silensyo ke  puede ser (para algunos de los reskapados) fue kaji al mizmo grado dolorozo kel  terrivle drama ke eyos avian traversado.

De karakter muy fuerte, Simone Veil no se desho abatir. Grasyas a su intelijensya superyor i su dinamizmo ekstraordinaryo eya se inskrivyo kaji immedyatamente  a la fakultad de “derecho”. Su diploma de avokata le avyo las puertas de una karrera  briyante  en la majistratura i la politika.

Su aktividad en las kestyones sosyales fue enorme . Myembro de la Unyon para la Demokrasia Franseza (UDF), eya tuvo un  trayekto politiko gloryozo.  Ardyente partisipante de munchas otras institusyones, eya  tambyen kolavoro kon asiduidad a la elaborasyon de numerozos proyektos  sosyo-kulturales.

Eya fue a diferentes epokas: “Prezidente del Parlamento Evropeo” i  partisipo a la kreasyon de la konstitusyon de este prestijyozo establesimyento grasyas al kual munchos  konfliktos pudyeron ser reglados en una atmosfera de komprensyon i konkordya ..

Simone Veil fue kargada de muy altas funksyones:“ministeryo de la Salud” , “ministeryo  de la majistratura i de  los echos sosyales” etc..etc...İ enfin, fundadora de la “İnstitusyon para la  Mantenensya de la Memorya de la Shoa”.

Komo dicho mas arriva. eya  lucho kon persistensya por la “igualidad de derechos“ entre ombres i mujeres i por un adjustamyento salaryal  entre  lavorantes maskulinos i femininos de mizma kompetensya.

De mezmo eya aktivo  la utilizasyon de  produktos  kontraseptivos   i mizmo parvino a azer votar una ley otorizando la interrupsyon (durante los primeros dias) de kualkyer estado de prenyez indezeavle, en el solo eskopo de evitar  intervensyones primitivas praktikadas en la klandestinidad por sharlatanes sin ninguna konosensya medikal.

 Aunke esta ley fue promulgada  kon el solo objetivo de evitar la muerte de munchas mansevas en situasyon de grande difikultad ekonomika asta no pueder asumir la karga materyal de un muevo myembro en la famiya., eya fue fuertemente kritikada  de la parte de differentes  Organizmos  relijyozos Kristyanos ansi ke Djudyos... Komo syempre mos topamos delantre dilemnas insolubles.

Simone Veil es i fue syempre una persona de grande noblesa en sus refleksyones, aktos i djestos... eya syempre  kedara fidel  a la memorya de los ke fueron eksterminados en los kampos de la muerte  entre  1942 i 1945, syempre sensible a la injustisya i a la muerte de inosentes, syempre militante por un akordo global afin de luchar kontra “el odyo del otro”, kontra la intoleransya,  el rasizmo i el antisemitizmo, afin de fundar un mundo bazado sovre el respekto del ombre i de su dinyidad.