Batya Natan

Una ijika de Galata

Una ijika de Galata

Komo ya lo savesh despues del dosye sovre Estambol, estamos kontinuando en el mez de Oktobre ( puede ser i al otro mez) a avlar por esta sivdad... A konoserla otrun poko... Konoser Estambol?... Ken puede pretenderlo? Por egzempyo yo es verdad ke me engrandesi aki. Eskrivo, en kada okazyon avlo por esta sivdad i digo mizmo ke so enamorada de eya. Egzakto... Ma, de otra parte, no puedo dezir ke la konosko muy byen.

En pasadas estava pensando, azyendo “moabet” de mi para mi. (Un pensador tyene dicho ke pensar es azer moabet de si para si). Yo ay kaji setenta i sinko anyos ke bivo en Estambol, i lo mas importante, nasi en Estambol. Bueno, malgrado esto yo no so Estambollu’ya , asigun mi karta d’identitad (nüfus). Estranyo no?!... Yo nasi en el Ospital Haseki, ma en mi karta d’identitad es eskrito Çorlu (Chorlu) komo lugar de nasimyento.

Mis paryentes biviyan en esta sivdadika de Trakya. Aserkandose el parto, mi madre (de b.m) vino a Estambol i se kedo ande una tiya suya. Unas, dos semanas despues ke nasi yo tornaron a Çorlu, siguro kon mi endjuntos. Asigun me kontavan mis djenitores, yo era apenas de unos, kuantos mezes kuando vinyeron definitivamente (kesin olarak) a bivir en Estambol. İ se instalaron en Galata. 

Keridos amigos, por siguro ke estarash demandandovos porke sinti el menester de eksplikar esto todo... Diremos ke me eskarinyi de azer moabet kon vozotros, ke dizish?!.. Esto es una razon, ma ay i otra. En rememorandome mi nasimyento, la sivdadika de Çorlu, me akodri de mi Nona Djoya (de b.m). Eran los anyos de gerra (1941-44). Toda la famiya de mi Papa aviya emigrado de Çorlu. Bivimos todos endjuntos en muestra kaza de Galata, asta ke toparon una morada konveniente. Lo ke no fue tan fasil en akeyos anyos de estrechuras. Mi papa estava azyendo el servisyo militaryo (20 Klasas). Estos dos, tres anyos djugaron un grande rolo en mi vida. Me ambezi muncho de mis avuelos.

Mi Nona no avlava muncho. Era muy dishiplinada i seryoza. Despues de anyos realizi ke no era solo la seryozedad ke eskuresiya su fizyonomiya. Eran los reselos de la vida, las mankuras achakes de la gerra, el eskarinyo de su ijo (mi padre) ke estava leshos de kaza desde un largo tyempo. Yo syempre me aserkava de eya kon una syerta entravadura (çekingenlik). Portanto ya saviya ke me keriya muncho. En fin de kuento yo era su unika inyeta  tradisyonalmente kon su nombre i alkunya.

Deviya tener yo 8-9 anyos. Un diya me aserki kon todo mi koraje! i le demandi: “Nona kontame un poko de Çorlu, no me akodro nada...” Koza ke no akontesiya muy frekuente, mi avuela tan seryoza ampeso a riir kon tarakas. Yo no supe ke azer del enkanto. Afilu mi Nono enkantado, alevanto kon kuryozidad la kavesa del “Me’Am Loez” ke no deshava de la mano... Kalmandose, mi Nona me respondyo : “Komo te puedes akodrar? Tu no bivites en Çorlu, no lo  konosites. Tu te engrandesites aki. Tu sos “una ijika de Galata”, no sos Çorluliya...” Kon lagrimas de revolta, koryi, tomi el nufus. Kon trionfo  amostri a mi Nona la oja ande aviya eskrito Çorlu komo lugar de nasimyento: “Vites Nona, yo no so Estambulliya, so nasida de Çorlu...”

Ma mi Nona teniya razon. Yo, reelmente era una “İjika de Galata”. Konosi i eskrivi en mis rekuerdos kada kantoniko, kada kalejika, los komersantes i botikaryos de esta distrikto ande pasi mis primeros 20 anyos...

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
457