Batya Natan

El diya del padre

El diya del padre

Munchos pensan ke este diya fue arregalado a los Padres komo una “replika” (karşılık) al Diya de la Madre. Ma, en realidad no es ansi. Tambyen i la selebrasyon del treser Alhad de Junyo tyene su propia istorya. Syertos investigatores, afilu pretenden ke ay dos diferentes orijines de este Diya. Dunke, el treser Alhad de Junyo, oganyo el 15, se va fyestarse. Portanto, syempre pensi ke esta selebrasyon  no alkanso a la popularidad  del Diya de la Madre. Porke?... No lo puedo eksplikar, ma a mi idea, es una indjustisya (haksızlık) ke se aze a estos “shovalyes” ke se enkargan la mas grande parte de responsabilidad del nido.

Mizmo si no es muy ansyano, (çok eski) el Diya del Padre tyene un pasado de mas de 90 anyos. Ay istoryanos  afirmando ke en la Roma Antigua ya se selebrava un diya semejante. Komo nasyo el Diya del Padre? Vamos a ver kuando i en ke sirkunstansyas, (durumlar) este diya ke se fyesta el treser Alhad del mez de Junyo vino al orden del diya. Komo el Diya de la Madre, es de orijen de los Estados Unidos.

En Washington, William Smart, un veterano de la gerra sivil, kedo bivdo (dul) despues de la muerte de su mujer, en paryendo su sejena kriatura. Este padre era un agrikultor (çiftçi) i engrandesyo sus sesh kriaturas sin dingun ayudo, en un kazal al este del estado de Washington. Su ija Sonora Dodd (unos afirman ke fue el ijo John) entrando en anyos, apresyo (takdir) komo su padre tan devuado, aviya kudyado soliko por sus kriaturas. Alora penso de  onorar su padre arregalandole un diya espesyal. İ, el 5 Junyo ke era diya de aniversaryo de W. Smart (el padre), ampeso a penar  para organizar este Diya del Padre. El rezultado de estos esforsos lo pudo tomar solamente un anyo despues. Ansi se pudo realizar la primera selebrasyon en el 19 de Junyo del anyo 1910.

Ma, fue solamente en el anyo 1924 ke se selebro ofisyalmente, kon el apoyo del Prezidente Calvin Coolidge. Munchos anyos despues, en 1966, el Prezidente Lyndon Johnson izo una deklarasyon en la kuala, estava indikando el treser Alhad de Junyo, komo diya del Padre. Entonses se empeso a selebrar kaji en el mundo entero. En muestro pais, fue verso la fin de los anys 80 ke ampeso mas muncho a konoserse el “Diya del Padre”.

Ser padre es una pozisyon, un estado ke egzija grande responsabilidad. Mizmo si los vemos syempre korajozos, son tambyen, i reselozos, (endişeli) porke eyos tyenen famiya, ijos, ke deven mantener i protejar. No biven sus vidas, asigun sus dezeos o kaprichos.Todo el tyempo, estan ensima de punchones, (diken üstünde olmak) son los “shevalyes” de la famiya i esto es lo ke se aspera de eyos.   En rezumen, no es  fasil de ser padre. Meresen no solo un diya espesyal, ma 365 diyas,komo lo penso egzaktamente i por las madres.

La kerensya, la abnegasyon de un padre son la luz ke nunka se amata, i ke toda la vida ilumina el kamino de sus kriaturas.                                                

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
458