Djueves la tadre el 22 del mez koryente, en el oditoryum del Ulus Özel Musevi Okulu, la pyesa teatral “Fidler on the roof”(Damdaki kemancı) de Sholem Aleikhem, fue interpretada kon muncha sensibilidad i komprensyon, por elevos aedados de 13/14 anyos.
Kaji todos ya konosemos la esmovyente istorya de este povereto lechero djudyo, ovligado de lavorar duro afin de pueder traer el pan del dia a su kaza ande lo asperavan una mujer i tres ijas para kazar... eya devino un poko el simbolo de lo ke era la vida en los shtetls de la Evropa Sentral, la epopea de un desdichado, leal enverso su fey i por la mas parte en kontinuo kontakto kon Dyo, raramente revoltado, ma kaji syempre demandandole kuento por todo lo ke se pasava en su entorno.
Kon su enorme umanizmo, las refleksyones profundas de sus dialogos i monologos, kon la otentisidad de sus personajes i el estilo partikular de su teksto, la pyesa Fiddler on the Roof es una ovra ke aze parte no solo del patrimonyo djudyo ma tambyen internasyonal. Eya mos aze yorar i riir en mizmo tyempo.
La riza fue syempre la primera reaksyon del Djudyo, viktima munchas vezes de injustisyas krueles .. komo un desfio kontra la mala fatalidad.
El solo fakto de azer interpretar esta pyesa de teatro tan umana, por estudyantes ke se topan a la edad de sus formasyon no solo kultural ma tambyen afektiva, testifika la alta kualidad del programa del Ulus Özel Musevi Okulu. Es importante de meter muestros ijos i ijas facha kon facha kon verdades ke azen parte de la vida Djudia, diferentes puede ser segun el lugar, ma en el fondo syempre semejantes, kon sus mizmos problemas, sus mizma prekaridad i sus mizmas aspirasyones.
Armonyoza koensidensya, el Alhad sigyente, la grande Sinagoga Neve Şalom estava desbordante de djente, yena de kantes, rizas, tualetas de damas de kolores a kolores, ninyos i ninyas en efervesensya, madres asperando el momento ande entrara la ija kerida al braso del padre ....En las fachas de los invitados una emosyon ke no se puede ekspresar kon byervos ma solo meldar en los ojos, esta emosyon partikular de los grandes dias ande sentimos, en el ayre mizmo ke respiramos, la prezensya de una fuersa surnatural, la shehina sin dubyo.
Una grande asistensya estava prezente para selebrar en toda su magnifizensya el Bat-Mizva de 62 adolesentes.Fue la primera vez ke un akontesimyento de esta dimensyon se realizava en muestra komunidad..
62 donzelas vestidas de blanko entraron kada una al braso de su padre, sovre la kavesa flores i en el korason el ermozo orgolyo de toparsen en el portal de la maturidad.
Diskorsos muy sinyifikativos fueron pronunsyados por Rav İsak Haleva, el prezidente de la komunidad Silvyo Ovadya i İvo Molinas los kualos ekspresaron sus kontentes. Poemas fueron resitados, kandelas fueron asendidas, onze de entre eyas a la memorya de las adolesentes ke muyeron en los kampos nazis i en golpes de terrorismo.
La Bat Mitzva
de las ijas, kostumbre relativamente resyente, es komo una afirmasyon de la importansa de la mujer en el Judaismo kon todo lo ke esto komporta de ovligo, de refleksyon i de responsabilidad... konsegrasyon de su rolo futuro de madre ke transmetra a sus ijos los prinsipyos de baza del Judaizmo.
Dos akontesimyentos diferentes... dos alegrias.
