Batya Natan

Moabet de Aki de Aya...

Moabet de Aki de Aya...

Keridos lektores, oy vamos azer un poko de moabet. No tengo un sujeto prechizo. Lo mas fasil va ser ampesar avlar del tyempo, komo uzamos a dezir “Havadan, Sudan!”... Ma, en primero kero eksprimir una opinyon.  Asigun mis observasyones, remarki ke mos izimos eskasos de palavras dulses, de byervos de enkorajamyento. Estamos mas  prontos a kritikar al lugar de gustarmos de la reushidad, de la felisidad de otros, porke?.. Muy ralamente ekspozo una semeja de pesimismo, no es mi manya. Deke ampesi ansi al lugar de eskrivir un ermozo artikolo de Primavera?.. D’akordo!..sera en un momento de ataganto, ma, en todo kavzo no aze danyo de vez en kuando de pozarmos estas preguntas i de responder sinseramente...

Estamos bivyendo la egzaltasyon de la Primavera. Ma, en pasadas, una amiga me estava dizyendo: “En  Avril ke deviya ser mez de luvyas, kada amanesimyento klaro, no me pude alegrar. No esto pensando al plazer de pasear. Mas muncho esto reselando los diyas futuros ke puedemos tener estrechura de agua...” Komo lo estash vyendo keridos lektores, al pareser el pesimismo es kontajyozo!!.. Oganyo no tuvimos un invyerno verdadero. La sezon ke los arvoles deviyan ser emblankesidos, ya es verdad ke los ramos se vistyeron sus “parür” blanka!.. Solamente kon una chika (o grande!!) diferensya.. No es la inyeve, ma fueron las flores blankas de arvoles frutyeros ke se adelantaron!..

En la kaye, en estos diyas ay una kontradiksyon permanente. No syendo siguros del aver, estamos salyendo ken jaketas godras, ken blazeres. Otros mas korajojos o mas mansevos!, kon tee-shirt o kamizikas. El sielo grizo se izo kaji abitual. Ma, mizmo si es timidamente, de vez en kuando, el sol mos esta amostrando su kara, para akodrarmos ke estamos en Primavera... Amanyana mos puedemos espertar kon un sielo eskuro, afilu kon luvya. Esto ne deve ser una razon de “mutra”.(somurtmak) A la kontra, kon un poko d’optimismo puedemos pensar:” Esta luvya va ser provechoza para la tyerra..” Naturalmente muestra buena umor sin azer despareser las nuves, va iluminar muestro diya. No mos kesharemos. Veniran diyas ke vamos a bushkar esta freskor..

Oganyo vimos otruna vez el “festival” de las flores de kolor i kolores... Deshando por un lado las kondisyones atmosferikas, Avril i empesijo de Mayo fueron  mezes de selebrasyones i evenimyentos. La fyesta de Pesah, despues las komemorasyones de la “Shoa,” del “Getto de Varsovia,” el “Yom Azikaron”, “Yom Aatsmaut” i el 11 Mayo el “Diya de las Madres”... 23 Mayo es el 33. diya del “Sefirat Haomer”, kijo dezir “Lag Ba Omer.”

En la Historya de los Djudios de Palestina, la peryoda de Omer fue markada de desgrasyas myentres la rezistensya de Shimon Bar Kohba kontra la dominasyon Romana. Asigun una Leyenda Talmudika, tambyen, en esta peryoda, nombrozos elevos de Rabi Akiva muryeron de una epidemiya. En los primeros 32 diyas de Omer no se aze selebrasyones komo bodas. En el 33. diya, 18 İyar uvo un kalmo en las violensas. Este diya, “Lag Ba Omer”, konsiderado sakro, tyene apoyo sovre evenimyentos istorikos. Es una festividad en el Kalendaryo Djudio, ma no mensyonada en la “Biblia.”

Keridos amigos, profitad de la mueva sezon, del renasimyento de la natura, ke inspira optimismo. No solo vash a ser de buena umor, ma tambyen un manadero de alegriya para vuestro derredor. No vos olvidesh: la buena umor, el optimismo son tambyen kontajyozoz!..

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
533