Batya Natan

Yom Hashoa

“YOM ASHOA” es el diya de komemorasyon de la mas grande trajediya umana del 20. Siglo. De todas las partes del mundo, grupos estan indo para partisipar a la “Marcha”. Estas personas, no satisfechos de sintir o meldar sovre este akto inumano, keren ser un ponte entre el pasado i el avenir... Keren sentirlo en sus almas para pueder transmeter a sus ijos i inyetos... Para amostrar al mundo ke malgrado todo, estamos egzistyendo. Los kampos de la muerte i entre otros Auschwitz, el simbolo funesto (meşum) de la mas grande trajediya de la Historia de los Djudios... No devemos nunka olvidarlo. Se eskrivera, se mensyonera i repetara asta la fin de los tyempos. El Olokosto no es un evenimyento ke deve kedar solamente entre las ojas de los livros de Historia. Es una realidad, es ser konsyentes (bilincinde olmak) ke semejantes kavzos syempre pueden akonteser en las kuatro partes del Universo.

Aki vo dar un egzempyo en relatando syertos pasajes tomados del livro “UNE VİE” de la Sra. Simone Veil.(*) Eya es una sovrebivyente de la “Shoa”. Nasyo en el 1927 komo la kuatrena ija del kupl Yvonne-André Jacob, i tuvo una chikes oroza. La identidad judia, era una konsiderasyon sin importansa para su padre. Antes de todo, ser Fransez era “primordial” (öncelikli) para el Sr. Jacob. Sintiremos la Sra Veil:

“Komo todas las famiyas djudias asimiladas, mi famiya paternal era patriota (vatansever) i laika. Se glorifikava kon su Patria, la Fransiya, ke aviya dado desde 1791, el derecho kompleto de “Nasyonalidad” a los djudios... Afilu  el koryente de “Antisemitismo” solevantado myentres el “Kavzo Dreyfus”(1894), no troko los sentimyentos de mi padre... No konosi dinguna nosyon de Judaismo en mi chikes. Porke mi papa era djudio, no por egzijensyas relijyozas, ma, por razones kulturalas. Asigun el, solamente los djudios i los aristokratos, durante siglos, fueron eruditos (irfan sahibi) i meldaron..” Ma, el “patriotismo” del Sr. Jacob no fue malorozamente un impedimyento (engel) a la deportasyon de la famiya entera al kampo Auschwitz-Birkenau... 

Shoa, el “Génocide” de los djudios, sinyifika la totalidad de las kulpas kometidas sovre un grupo etniko-relijyozo. Kero terminar kon las frazas del ilustro eskrivano, Elie Wiesel, el tambyen un reskapado de la Shoa, un sovrebivyente... “Oy en diya vamos demandando: kualo es Auschwitz?... Un final o un empesijo? O, un aborresimyento alimentado kon senaryos de komploto, kon kampanyas kontinualas manchando, kalomniando un puevlo?... O, puede ser, una vizyon de la vanda diabolika del karakter umano?...” 

(*)-Simone Jacob Veil nasyo en 1927 en Nice. En el Marso 1944 fue deportada kon toda su famiya a Aushcwitz-Birkenau. En el 29 Enero 1945 fue reskapada. Estudyo en la Universidad de Paris, entro en la Politika. En 1975 fue “Ministro de Sanedad”. Entre los anyos 1975-1982 fue prezidente del Parlamento Evropeo. Aktualmente es la prezidente “Onorarya” de la “Fondasyon por la Memoria de la Shoa”,  ke apoyo aktivamente la Fondasyon  J. E.A.A (Judeo-Espanyol a Auschwitz).

Asta el Marso 2003, en el “Memorial Auschwitz-Birkenau, entre las 20 lajas  (mezar taşları) en  diferentes linguas, no aviya una en Judeo-Espanyol.. Lingua ke fue la de 160.000 Sefaradis deportados del Balkan i otros paises. Grasyas a las tentativas de J.E.A.A enkavesado por Prof. Haim-Vidal Sephiha, el 23 Marso se estreno la laja en

J-Espanyol.C.D

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
499