Fotografiyas: Alberto Modiano
Juevez pasado, en el lokal de la Fakirleri Koruma Dernegi , la facha luminoza de muestra Komunidad fue selebrada kon grande emosyon, simbolo de un umanizmo kompuesto en mizmo tyempo de aktos karitativos i de varias aspirasyones kulturales.
“La bushkida de la verdad istorika” ansi ke “el amor de la sensya i del arte” lado kon lado kon “la solidaridad”.
Lungos anyos antes, en las primeras dekadas del venten siglo, dos premyos fueron kreados en muestra komunidad afin de no deshar kaer en el olvido la memorya de Josephine Marcus i de Jane Elkus, todas las dos muertas prematuramente.
El Premyo “Josephine Markus”
fue atribuido a:
Emel Bahar de la “Matan Baseter”
Ansi ke a
Mazaltov Araf
de la “Mishne Tora”
por sus esprito de abnegasyon i la alta kualidad de sus lavoro karitativo
Tambyen:
Vivi Beskenazi
del “Dostluk Yurdu Derneği”
Matilda Debensason
del “Or-Ahayim”
Perla Hazan
del “Göztepe Kültür Derneği”
Rozi Ojalvo
del “Ihtiyarlara Yardım Derneği”
Sara Taragano
del “Neve Şalom Vakfı”
Viket Bahar
del “Yıldırım Spor Kulübü”
resivyeron una mensyon de grande apresyasyon por la asiduidad de sus lavoro respektivo:
El Premyo “Jane Elkus”
fue konsedido a:
Lina Filiba por su intenso lavoro komunitaryo de un alto nivel intelektual i moral
ansi ke a
Beki Ipekel por la suma de su lavoro karitativo i su senso de la solidaridad.
A estos dos premyos ke datan del prinsipyo del siglo pasado, se adjuntaron los sigyentes:
El Premyo de Medikeria
“Yasef Yahya”
ke syempre salvara del olvido la memorya de la viktima de un akto inyovle de terrorizmo, fue atribuido a:
David Ojalvo
estudyante en la fakultad “Cerrahpaşa Tip Universitesi”, por sus grandes kualidades de moralidad i de asiduidad al estudyo.
El Premyo de Muzika “Yaşar Paker”
fue akordado a
İzi Eli
por su lavoro en el kampo de la evolusyon de la muzika Sefardi.
“El Premyo de Kultura”
fue, el, atribuido a:
Rifat N. Bali
por sus muy presyozas investigasyones en el kampo de la Istorya de muestra kolektividad , bushkidas syentifikas muy metikulozas, syempre bazadas sovre dokumentos otentikos.
Esta seremonia konfirma (una vez mas) las valores de baza de muestra komunidad i manifesta sus objetivos prinsipales ke son “la asistensya sosyal” i “el kontinual esforso echo en el kampo del perfeksyonamyento”.
Tenemos la esperansa ke varias otras İnstitusyones ke kontribuan al mantenimyento de la solidaridad komunitarya ansi ke al desvelopamyento i a la transmisyon de aspirasyones i aktividades Judias, seran tambyen eskojidas, en el futuro, para resivir semejantes sinyos de apresyasyon.
Desde la leshana antiguidad, el Judaizmo, aunke kaji syempre en estado de prekaridad, traso los parametros de un destino eksepsyonal de umanizmo i espiritualidad, en un mundo ande el materyalizmo devino desgrasyadamente la aspirasyon de baza de milyones de mujeres i ombres.
