Ay momentos ande todo parese arrestarse en la persona, komo si se topava en un mundo vazio, tal un estado de non-ser, ande el benadam se syente undido.
Ma poko a poko la vida rekovra sus derechos, imperyozos, imperativos... la ambre i la sed reaparesen i kon eyas la sufriensa.
Me ambezi muncho de Elie... me ambezi ke la fidelidad no se topa en el yoro o la lamentasyon ma en el rekuerdo, en esta prezensya kaji kontinual aunke invizivle de la persona ke no esta maz.
Me ambezi ke no tenemos el derecho de renunsyar a la vida... el renunsyamento es una demisyon...i en munchas sirkunstansyas demisyonar es traisar...
Devo todo lo ke so a dos personas, todas las dos nombradas Elie, el primer mi avuelo İlyau Kasavi en la kaza del kual, guerfana de padre a 10 mezes, me engrandesi... El segundo Elie mi kompanyero,konfidente i giador de syempre.
Devo tambyen muncho a mis serkanos, paryentes i amigos... a la komunidad a la kuala apartengo, la komunidad Judia de Estambol, kon su kayentor moral ke parese venir del fondo de los anyos, i su potensyal inakavable de afeksyon.Kada uno kon su manera de pensar o de ser, ma en los momentos de apreto, todos unidos malgrado lo ke envezes mos desferensya..
Semos echos de todo esto, de todo lo ke resivimos i de todo lo ke damos, vemos, o oyimos, mizmo de todo kontra lo kualo protestamos i mos revoltamos...
Me topo en la imposibilidad de agradeser personalmente todos los ke me sostuvyeron moralmente kon sus prezensya, sus palavras de konsolasyon, sus yamadas telefonikas, e-mailes, letras, donos de byenfezensya, flores i kerensya; toda mi gratitud a mis amigos de Turkia, Israel, Fransya, Estados Unidos, Espanya, Damas, Almanya i İngletera... Rengrasyo todas la institusyones ke manifestaron sus simpatia ansi ke sus amistad i tambyen partikularmente el Grupo Ladino-komunidad kreado por Rachel Bortnick..
Ke este mundo ke es el muestro sea syempre un mundo de kerensya i amistad.
