Batya Natan

A la okazyon de 8 Marso

Este artikolo es en una manera, el kompletamyento del teksto miyo de la primera oja de “El Amaneser”. Kije adjustar unos, kuantos propozitos a la okazyon del 8 Marso,”Diya İnternasyonal de los Derechos de la Mujer.” En realidad, los anyos pasados ya tuve eskrito anchamente sovre el sujeto. Oy puedemos un poko avlar espesyalmente de la “Mujer Sefaradi”.

Me akodro en mi chikez, kuando se demandava a una ninya lo ke se va azer en engrandesyendo, eya respondiya: “Yo me vo azer novya!!”. Oy en preguntando lo mizmo a una muchacha kualo eya responde?.. Munchas kozas, ma entre eyas muy probavle no va dezir ser “unikamente” novya i madre... Keren ser tambyen mujeres tenyendo karyera i kriaturas. Es sus derechos... estos derechos ke asigura a la Mujer, igualidad kon el Ombre.

Diversas organizasyones, komo el “Movimiento de la Libertad de la Mujer” i otras, lucharon para obtener los mizmos derechos sosyal, igual a los del Ombre. Entre otros, libertad de instruksyon, de eskojer karyera i manera de bivir, derecho de votar i ser elijida ets...

Durante siglos la Madre Djudia Tradisyonalista Sefaradi, fue el pilar (dayanak) de la famiya. Es grasyas a eya ke konservimos las tradisyones folklorikas i relijyozas. Grasya a eya, ke oy estamos pudyendo (malorozamente no todos) avlar, eskrivir el Judeo-Espanyol i azyendo esforsos para no deshar al olvido la Kultura Sefarad. Puede ser ke aktualmente se diskute ke grado la Madre Djudia esta kontinuando su misyon de “Transmisyon” de la Lingua i Kultura de muestros ansestros... Es un sujeto ke merese konsiderasyon, ma ke probavlemente puede kavzar polemikas i debates. No me esto sintyendo el “Derecho”! de ekspozar mis ideas de una manera unilateral (tek yönlü). Prefereriya un interkambiyo de opinyones...

Los propozitos de ariva sovre la Madre Djudia aktuala, no deven ser konsiderados unikamente komo kritika. Es simplemente una konstatasyon. A la kontra, ser testigos  de la evolusyon de muestras ijas (futuras madres) mos glorifika. Tyenen la libertad de azer altos estudyos para aparejarsen una karyera i lavorar, ke es uno de los derechos fondamental de la persona. Estamos vyendo estas ijas kaji en todos los domenos profesyonal.

Syertos lavoros, o karyeras, dayinda estan en el monopolyo de los ombres. Par konsekuensa, ay un apartamyento... D’akordo, ma aki no vo ir al fondo de este aspekto. Porke ya savemos muy byen, la sovredicha igualidad entre mujer i ombre, en vezes esta kedando en la teoriya. Esto avlando de una jeneralidad, i no solo de la Mujer Djudia... Asigun bushkidades i observasyones universal, oy en diya, no se puede pretender ke todas las mujeres estan en posesyon kompleta de sus derechos. Nombrozas son las ke, en el korso de los anyos afilu, no tuvyeron grande amijoreamyento en sus kondisyon de vida. Aki se puede avlar de presyones kavzadas por los uzos lo mas relijyozos       o tradisyonal en syertas komunidades. Son komo los ke nombramos aki, en Turkiya: “Töre, Örf ve Adetler”ets...

Lo di en egzempyo, porke estos kavzos munchas vezes estan en la aktualidad. Se puede remedyar  esta yaga?.. Kreo ke si, kon muncha pasensya i enstruksyon...       

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
446