LA VIKTORIA DEL FILMO DE LOS ERMANOS COEN

Dora NİYEGO Judeo-Espanyol
1 Mart 2008 Cumartesi

El filmo de Joel i Eytan Coen ‘’No Country For Old Men’’, gano los prinsipales kuatro Premios de la Seremonia Oskar, ke es la mijor seremonia en el mundo del espektakulo.

Kon este filmo, los ermanos Coen ganaron los premios de los mijores direktores, los mijores produktores del mijor filmo i el mijor guian (senaryo) adaptado. Al lado de estos tres premios ke los Coenes resivieron, el filmo gano el premio del mijor segundo aktor.

El filmo ‘’No Country’’ esta kontando la istoria de la violansia en un kanton aleshado del oeste de Teksas. Este filmo, adaptado de una novela (roman) de Mc Carthy, los izo a los ermanos, los viktoriozos de la nochada.

Kuando fueron yamados a la sena, los ermanos Coen les kontaron a los espektatores, komo empesando de sus chikes, lavoraron kon grande kreensia en este kampo, i komo, de diya en diya, yegaron a mas grandes masas (kitle).

Si los ermanos Coen ganavan el premio de editores ke fueron nominados por el mezmo filmo kon el pseudonym Roderic Jaynes, eyos ivan a ser el champeon de la istoria de Oskar, ganando kuatro premios por el mezmo filmo.

En la istoria de la seremonia Oskar, asta oy, solo los reralizadores de tres filmos resivieron tres premios por el mezmo filmo. Estos viktoriozos son Francis Ford Coppola (kon el filmo ‘’The Godfather Part 2’’ ); James Cameron (kon el filmo ‘’Titanic’’); i Billy Wilder (kon el filmo ‘’The Apartment’’).

Ademas de los premios, el filmo ‘’No Country’’ los izo ganar a los ermanos Coen, una soma de 64 million dolares i 45,5 million dolares (en chifros brutos) de los biletos vendidos por el filmo ‘’O Brother Where Are Thou’’.

Joel i Ethan Coen, konosidos komo ‘’Los Ermanos Coen’’, eskrivieron, dirijaron i izyeron munchos filmos reushidos. En los anyos dalkavo, Joel fue mas reushido komo direktor i Ethan komo produktor. En el kampo del espektakulo, los dos ermanos son yamados kon el nombre ‘’Direktor de Dos Kavesas’’ porke los aktores dizen ke por kada kestion, los dos ermanos les dan la mezma repuesta.