Nicolas Sarkozy propoza de azer partisipar eskolaryos de 10-11 anyos al "Dever de Memorya" enverso las chikas viktimas Fransezas de la Shoa
El 13 del mez koryente, Myerkoles la noche, el prezidente de
la Republika Franseza
manifesto el dezeo de asistir personalmente al Pranso anual del Crif (konsilyo reprezentativo de las İnstitusyones Judias Fransezas) lo ke fue un grande onor para
la Komunidad
de los Judyos de Fransya.
Despues de aver ekspresado la grande amistad ke el resyente por Israel i su immenso dezeo de ver asta la fin del anyo, la realizasyon de un akordo definitivo kon el puevlo Palestinyano, Nicolas Sarkozy insistyo sovre dos sujetos partikularmente sensivles: "el laisizmo" i "la sensibilizasyon de la konsensya moral de los ninyos Fransezes desde sus chika edad". El repeto kon insistensya ke "laisizmo" no sinyifika renyegamyento relijyozo, ma respekto por todo modo de kreensa i ansi (a kondisyon de nunka kaer en el fanatizmo) posibilidad de koegzistensya armonyoza de diferentes feyes , en un esprito de toleransa resiproka.
El tambyen adjunto ke todo modo de epoka nesesita una parte de espiritualidad ;"La shoah" trajedia del venten siglo, no fue provokada por
la Idea
de Dyo, ma al kontraryo por su terrivle absensya.A este propozito,(debasho la denominasyon de "Misyon Darcos", el anunsyo su dezeo de konfiar al empesijo de kada anyo eskolaryo, a kada elevo de sinkena klasa, aedado de
10 a
11 anyos , la memorya de uno de los 11000 ninyos de Fransya viktimas del jenosidyo perpetrado por los nazis..
Las reaksyones i las protestasyones de nombrozos intelektuales fueron muy fuertes i munchas vezes inkomprensibles , bazadas sovre argumentos psikolojikos i sosyolojikos al pareser sin konsistensya..Entre los ke protestaron: Simone Veil, la kuala empleo los adjektivos "inimajinavle", "insostenible (insoutenable)", "dramatika" i "indjusta" para kalifikar esta propozisyon.
Las razones ke eya inisyalmente prezento, no paresen ser konvensyentes. Eya dyo komo argumento de baza ke no se puede inflijir una koza semejante a ninyos de 11 anyos, ni demandarles de identifikarsen a ninyos muertos.... "Una semejante memorya sera muy pezgada a yevar, i de otra parte, una tala mezura riska de eksitar los antagonizmos relijyozos.
Se puede responder ke no se trata para los eskolaryos en kestyon, de asumir la sufriensa del destino trajiko de los ninyos ke fueron salvajemente eksterminados en
la Shoha
, ma de ambezarsen, de saver le ko se paso aya, en los kampos de la muerte, de imajinar lo ke fue la terrivle injustisya de lakuala estas chikas viktimas fueron el objeto.Konsernando el argumento ke no se puede inflijir esto a chikos de 10-11 anyos, la repuesta es malorozamente fasil. En el dor ande bivimos, los programas de
la Televizyon
ya se kargan de inisyar muestros ijos i inyetos a la violensa, desde kaji sus nasimyento.
Enfin, vinyendo al argumento "ke esto puedra provokar en las famiyas katolikas o muzulmanas, una fuerte dezaprobasyon",la repuesta es: ke es anchamente tyempo de azer salir una partida de la umanidad, del estado de "letarjia moral" ande se topa undida.
Asumir "un dever de memorya" no sinyifika: asumir la responsabilidad de aktos ke fueron perpetrados anyos antes , ma solo: asumir la responsabilidad de un "esforso de akodro" afin ke esto no se repete mas nunka, en ningun lugar del mundo, kual ke sea el orijen de las viktimas".
Martes 19/2/2008
Debasho el titolo "Memorya de
la Shoa
":
la Prensa Franseza
anunsyo lunes demanyana ke Simone Veil aksepto de partisipar a la "misyon Darcos" . Entre tyempo el "Elysée", de su parte, modifiko un poko su primera deklarasyon: " El enkargamyento del rekuerdo de un ninyo eksterminado" ke devia ser individual, devino kolektivo. Es la sinkena klasa ke sera kargada de asumir su memorya i no kada elevo personalmente.
