Un mizmo partido politiko, dos kandidatos

Klara PERAHYA Judeo-Espanyol
13 Şubat 2008 Çarşamba

Komo ya vo lo tengo dicho, kada vyernes demanyana, sovre el posto LCI de la televizyon Franseza, dos grandes pensadores de muestros dias: Luc Ferry i Jacques Julliard diskuten al sujeto de uno de los problemas mundyales de la semana

Dos refleksyones diferentes igualmente lojikas aunke munchas vezes kontraryas la una a la otra, sin por esto destruirsen entre eyas, kada una kon su potensyal de realizmo i su poder de refleksyon.

Komo se asperava, esta semana eyos avlaron de la proksima eleksyon prezidensyal Amerikana i del duelo entre los dos kandidatos del partido demokrato:

Hillary Clinton la kuala durante el mandato de su marido, lucho muncho serka del “Kongreso” (sin malorozamente obtener un rezultado palpavle) para azer pasar leyes sosyales en favor de los desmamparados i ke tambyen mostro grande esprito de ponderasyon a la epoka del eskandalo seksual ke eskuresyo la fin de esta mizma lejislatura.

Barack Obama de kuero bruno, ijo de paryentes muzulmanos, el mizmo agnostiko (bilenemeci) konvertido ofisyalmente al katolisizmo, mansevo de una intelijensya briyante, ardyente en su dezeo de ser elijido kandidato definitivo del partido demokratiko.

Todos los dos de grande valor, pragmatikos sin nunka traisar el ideal sosyalisto del partido al kual eyos apartyenen.

Segun lo ke meldi estos de alkavo dias en la prensa internasyonal, en la dekada 1990 Hillary Clinton i Barack Obama tuvyeron kaji la mizma aktitud delantre el problema Israelo/Palestinyano.

En 1998, Hillary Clinton izo deklarasyones pozitivas en favor de un Estado Palestinyano, alora mizmo ke esta opsyon no era ainda defendida publikamente por la administrasyon de su marido.

A la mizma epoka, Barack Obama, elijido Senator, partisipo à munchos eventos organizados por grupos arabos amerikanos de la rejyon de Chicago.

Oy en dia todos los dos trokaron sus diskorsos en favor esta vez de un apoyo kaji inkondisyonal a Israel.

Mas pujavan las posibilidades de ser kandidatos a la eleksyon prezidensyal, mas estas dos personalidades se esforsaron de pareser komo fervyentes pro-Israelyanos.

Hillary Clinton se rendyo en 2006 en Israel afin de provar su apoyo sin falta al Estado Ebreo. Akompanyada de personalidades Israelyanas, eya vijito la “pared de proteksyon” i deklaro sostener este prinsipyo por razon de seguridad... De mezmo, en el senato, eya syempre voto en favor de todo modo de akto de prekosyon contra el terrorisme.

Barack Obama de su parte parese tambyen sigir la mizma linya de kondukta. En 2007 el se rendyo al “American Israel Public Affairs Committee” ke es el elemento el mas poderozo del Lobby pro-Israelyano de los Estados Unidos i deklaro kerer prezervar el engajamyento total konsernando la "relasyon de defensa" ke ata los Estados Unidos a Israel.

I mizmo, en las pasadas, el eskrivyo al reprezentante Amerikano de la ONU afin de egzijir la notifikasyon del “derecho de Israel a la oto-defensa” en la rezolusyon relativa a la situasyon en la Banda de Gaza..

Segun Luc Ferry i Jacques Julliard, la eleksyon de Barack Obama sera un trokamyento radikal en la politika Amerikana, una avyertura del Oksidente verso el Oriente, una posibilidad de verdadero dialogo i (adjuntaremos) un ekstraordinaryo prestijyo moral para los elektores Amerikanos..

Hillary Clinton?... Barack Obama?... para los judyos del mundo entero un mizmo reselo una kestyon, la mizma desde mas de 2000 anyos: “kual sera el mijor kandidato para Israel?”