“...Verso la Paz Amarga ”

Klara PERAHYA Judeo-Espanyol
31 Ocak 2008 Perşembe

En el ultimo numero de la revista mensual Franseza “İnformation Juive” del mez koryente, ay entre munchos otros artikolos enteresantes, los rezultados de entrevistas echas kon dos grandes istoryanos kontemporeanos. El primer kon Alexandre Adler ke los frankofones de muestra komunidad konosen byen, el otro kon Andre Kaspi profesor emeritus a la Sorbonnei grande espesyalisto de la sivilizasyon i politika Amerikana ansi ke de las estrukturas komunitaryas de los Judyos Amerikanos...Todos los dos son byen konosidos en el mundo intelektual oksidental por sus analizis sosyo- istorikos. Esta semana vo empesar por el artikolo konsernando

la Konferensya

de Annapolis “Oriente Medyo: verso

la Paz

amarga”.

El titolo no parese ser muy rekonfortante. Es un fakto ke el mundo no tyene menester de un optimizmo vano, ma de un realizmo rasyonal ande las kozas seran analizadas sin falsas esperansas ni sovre todo manifestasyon de grandes emosyones.

Ansi vos do, debasho de estas linyas, traduksyon de unos kuantos pasajes de esta intrevista:

Inf.Juive, En meldando lo ke eskrivitesh a este sujeto, tenemos la impresyon ke ay komo un empesijo de trokamyento en el Oriente Medyo...

Adler: Las kozas las mas inesperadas akontesen envezes. Es vedra ke este trokamyento mos es difisil a entender. El estado de esprito de los Palestinyanos no fue nunka tanto negativo, la edukasyon ke eyos dan a sus ijos no fue nunka tanto kalamitoza, i es en estas kondisyones ke espunto un chiko grupo pragmatiko, el kual (por razones interyores i tambyen eksteryores) esta negosyando seryozamente kon

Israel

.

Este grupo pragmatiko esta poko a poko konkuistando una mayoria. Por seguro no una mayoria konvensida de la nesesidad de bivir kon los Judyos i de amarlos, ma una mayoria ke dezea salir de esta situasyon kaotika ande Arafat los echo...

Kale tambyen dezir ke no es mas

la Siria

ni el Irak ke dominan oy

la Politika Araba

al Este de Suez, ma

la Arabia Saudita

, este payis ke es puede ser manko evoluado kel puevlo Palestinyano sovre el plano de la mentalidad i de la vizyon del mundo,ma ke es dirijido por un ombre aklarado. Oy en dia, el Rey Abdallah de Arabia Saudita utiliza toda su influensa afin de topar enjunto kon los amerikanos una solusyon politika.Ke es vuestra opinyon sovre la konferensya de

Annapolis

?Adler: No uvo abrasos delantre de

la Kaza Blanka

, ni deklarasyones sovre “un grande merkado Israelo-Arabo”, ma por kontra una deklarasyon muy simple ,segun lakuala las dos partes se engajan a bushkar enjuntos una solusyon. Es en este kuadro juridiko, sin ninguna efuzyon de amistad, ke se topa probavlemente las mijores shanses de esta konferensya.

 

Portanto sovre el terreno, en

Gaza

i Sdérote, no se ve el mas chiko amejoreamyento.

Adler: Los insidentes de Sdérot son kavzados sistematikamente por el Djihad Islamiko i por el Hamas. Investigasyones muy seryozas mostran ke en Gaza el Hamas pyedro enormemente de su odiensa. Aktualmente Mahmoud Abbas tyene un mayoria muy grande....

 

Por lo ke es del rezultado de esta konferensya, devemos akseptar ke Ehud Olmert es la ultima persona a ser oyida en Israel... la sola solusyon mizmo si esto parese irrealizavle es un governo de intereso nasyonal kreado por Netanyahou grande amigo de los Estados Unidos i Barak, governo de koalisyon ke solo puedra azer las konsesyones amargas menesterozas......

Ansi es el punto de vista de Alexandre Adler... desizyones dolorozas, sakrifisyos de munchas aspirasyones, de munchos proyektos, ma en el orizente leshano una chika luz ke parese no kerer nunka amatarse.