Batya Natan

Relasyones entre los ermanikos

Relasyones entre los ermanikos

Kuando eskrivi el teksto sovre los avuelos, o mas egzaktamente, por la fyesta de los avuelos, otomatikamente, pensi a los inyetos. Kero dezir, a las kriaturas, a los ermanikos... Alora dishe ke seriya una buena okazyon de eskrivir por estos ermanikos, chikos i (o), sovre sus raportos. Ermanikos i ermanikas…Ken disho ke son komo el perro i el gato!?… Se adoran, se keren, i se syenten pyedridos si estan leshos unos de otros. Partajan las mizmas aktivadades, i afilu en vezes, los mizmos amigos, si no tyenen entre eyos una grande diferensya de edad.

Portanto, de vez en kuando, se remarka problemas en sus relasyones, una tansyon, i por una bavajada, se kestyonan. Syempre esta situasyon no va fin a un pleto seryozo. Ma, ya se ve ke un “kara kedi!” paso entre eyos… İ enduna, el atmosfera se apezga, devyene polvora, (barut) ke a la primera senteya, eksploza en gerra. Los paryentes son los espektatores, sin pueder ni tener la shans de intervenir. En verdad ke es una koza inkreivle, no?…Yo personalmente, no bivi esta eksperyensa, en tal ke madre, porke engrandesi un ijo regalado. İ en tal ke kriatura, durante mi chikez, no uvo entre mis ermanikos i yo, dingun problema.

Kuando nasyo mi primer ermaniko, entri muy fasilmente, en mi rolo de “ermana grande,” porke reelmente no tengo un karakter selozo. No paso muncho, ya mos topimos entre los reselos, espantos, estrechuras de la 2. Gerra  Mundial. Mi padre leshos de kaza, en el servisyo militaryo de “rezervisto”, en el kuadro de las 20 Klasas. En kurto no teniyamos ni gana, ni menester de pelearmos, lo ke iva atristar mas demaziya mi madre. Yo  teniya 12 anyos kuando nasyo mi sigundo ermaniko. Entri en el rolo de “petite maman,” aun ke estava kontinuando mis estudyos.

Es difisil de entender el dezakordo entre los ermanos. Ma es normal, les permete de afirmar sus personalidad, de deskargar sus tansyones i  enforteser la amistad entre eyos. Esto lo ke dizen los psikologos. En una famiya ande ay kriaturas, dingun risko de enfasyo!… Se topa anekdotas de eskola,  endjenyos a inventar, i djugos. Mizmo si entre eyos ay en dezakordos, los ermanikos se engrandesen debasho el sinyo de una komplichita! (suç ortağı) inosente...

Se deve embezarles la importansa de “Partaje” ke les inkulka la nosyon i la kapachita de estableser buenas relasyones kon otras personas. Eyos se renden kuento tambyen, ke adjuntandosen, estan mas fuertes para rezistir! a kualkyer dechizyon de los paryentes ke, asigun eyos, es  indjusta… Es un komporto tipiko. Se pelean, ma kuando vyene el momento de opozarsen a los paryentes, se azen alma i korason!… Komo dezir ”Birlikten kuvvet doğar!” İnutil de enumerar egzempyos, poko o muncho los paryentes, konosen estos numeros! de sus ijos…

Kuando el muevo bebe nase, el bohor, syente el menester de defender su pozisyon. Se puede mostrar otoritaryo, selozo de los privilejyos akordados al mas chiko. Son diyas determinantes sovre su komportamyento. El bohor, giado por el dezeo de no pyedrer la atansyon familyal syendo regalado, aze munchos esforsos, en la eskola ets…İ toma buenos rezultados. A los paryentes kaye una misyon muy importante: rekonoser estos esforsos, felisitarlo, i mizmo darle una rekompensa. Esto puede ser la baza del futuro buen entendimyento entre los ermanikos.

No kale olvidar, ke karar de fuerte ke seya sus amistad, syempre egziste entre los ermanikos una rivalidad, ke es el sinyo de sus personalidades. Kuanto a los paryentes, del punto del ekilibro moral de las kriaturas, es muy importante de akordar a kada uno, i uno, entereso, kudyo, amistad i pasensya sin fin.

Yo no konosi estos problemas, no ay nada de personal en este artikolo. Ma, ize observasyones, i reushi el teksto, grasyas a mis inyetos!, i otros ermanikos de mi konosensya…

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
505