Debate al sujeto de una chika fraze

Klara PERAHYA Judeo-Espanyol
16 Ocak 2008 Çarşamba

La semana pasada, entre munchos otros sujetos, dos diferentes temas enteramente ajenos el uno del otro, okuparon la prensa i el espasyo odyo vizual internasyonal:

Primo) komo fue dicho en la rubrika “novedades...novedades..” el Viaje de Georges W Bush en el Oriente Medyo kon la esperansa de ayegar verdaderamente a una solusyon ke permetra la egzistensya lado kon lado de dos puevlos ke fueron durante mas de 50 anyos enemigos, i de parvenir a una situasyon de vezindado en la armonia, todo en guadrando, kada uno, sus propyas espesifidades.

Segundo) la chika fraze kel prezidente Nicolas Sarkozy pronunsyo en su diskorso de Muevo Anyo adresado al puevlo Fransez: “...una politika de sivilizasyon” lakuala desho los oditores muy perpleksos sovre su real sinyifikasyon .Ke kijo dezir Sarkozy?

 Tuve la obstinasyon de meldar varyas eskritas i de sigir a la televizyon numerozos debates a este sujeto. Segun kel redaktor del artikolo o del komentaryo verbal, era de tal o tal otro partido, su komprensyon de esta mizma deklarasyon fue diferente.

Grandes intelektuales komo ombres de la kaye miraron de deshifrarla, sin malorozamente ser enteramente konvensyentes, salvo, segun mi, Luc Ferry ke personalmente konsidero komo uno de los mas grandes pensadores de muestra epoka.

A un syerto momento, en una diskusyon sovre el mizmo sujeto kon Jacques Julliard tambyen grande Pensador Fransez, Luc Ferry disho: “ Si,el pragmatizmo es una kondisyon absolutamente nesesarya (en la governansa de un payis), ma no sufizyente” (lo ke demanda un esforso kontinual de sivilizasyon).

Tuve alora la kuryozidad de konsultar el diksyonaryo ansiklopediko Larousse, afin de tener la djusta djusta sinyifikasyon de la palavra “sivilizasyon”.

Topi lo sigyente ke vos transmeto en unos kuantos byervos: “Konjunto de karakteres propyos a la vida intelektual, artistika, moral i materyal de un payis”, “ Nosyon karakteristika de la vida sosyal de un grupo umano, kon su manera de bivir, su sistema de edukasyon i su teknika...” i mas leshos: “konjunto de leyes i kostumbres ke aleshan el ombre de la barbaria”

En un byervo “ni un mundo sin industria i progreso tekniko” ni tambyen, “un mundo asujetido solo al progreso tekniko i industrial”... un mundo ande el umanizmo, las aspirasyones artistikas i literaryas tendran un ancho kampo de evolusyon, ande “el saver pensar” i “el saver entender” seran en igualidad kon “el saver azer”.

La sivilizasyon es esta fakultad de bivir kon personas diferentes de mozotros, kada una kon su manera de pensar, a la kondisyon de respektar la de los otros en las limitas trasadas por la sosyedad, i esto no solo en un esprito de toleransa, ma de avyertura.

“Ser fidel enverso si mizmo,  ma no kedar estatiko en una mizma manera de pensar", “metermos syempre en kestyon a la luz de muevas sirkunstansyas o de muevas persepsyones”... “syempre kestyonarmos sin prejuisyo ni espanto de lo ke diran los otros...”

Ser kritiko enverso si mizmo no es renyegarse, al kontraryo es evoluar. La mundyalizasyon kon su potensyal de enerjia al nivel universal egzije de mozotros un adelantamyento kontinual sin presipitasyon, ni oportunizmo...