Kol akoes hahtomo mistaleket mimenu: el ke se ensanya, su sensya se le resfuye de el.
En la perasha de Matot meldamos este kapitolo: I Elazar Akoen disho a los varones del fonsado ke se avian ido a la gerra, esto es el fuero de la ley ke el Kriyador enkomendo a Moshe.
En el talmud dize Rish Lakish. Un Rabino renomado de el Talmud, trae a la konosensya dizyendo: Todo ombre ke se ensanya, si es savyo piedre su sensya, si es profeta piedre su profeteziya. Si es savyo piedre su sensya, no lo enbezamos de Moshe Rabenu, i Moshe se ensanyo kontra los komandantes del fonsado, los mayorales de miles, i los mayorales de syentos ke viniyan de la gerra. Despues de este pasaje vemos en la perasha ke la palavra tomo Elazar Akoen, por kavza ke en akel momento ke se ensanyo Moshe Rabenu perdyo Moshe Rabenu su sensya i no tuvo la fuersa de avlar.
Puedemos imajinar, en el real ke se topavan sheshentos mil ijos de Israel, todos parados delantre de Moshe Rabenu, esperando ke Moshe Rabenu va tomar la palavra i les va enbezar syertos preseptos de la ley. Sintyendo la boz de Elazar Akoen se demandaron de unos a los otros por ke no avlo Moshe Rabenu.
Nos enbezamos de este kavzo, la persona se da la pena por deprender la sensya, en la ora de su sanya piedre todo lo ke se enbezo. La persona ke tira la ravya, i la sanya de su korason adova todos sus mankuras.
El rabino Rabi Hayim Vital diziya, la ravya es el pekado grande ke puede kometer la persona. Tanto ke se aravya o se ensenya en kestion de mitsva, tanto ke se ensanya en enbezando a sus ijos o elevos. La ravya es ravya i es una kulpa ke komete. Los yerros i las kulpas la persona komete a azerlos kon uno de sus myembros de su kuerpo, ma la ravya danya la alma de la persona i aze terefa a su korason.
Al rabino Rabi Yosef Karo ke eskrivyo el ovraje, Shulhan Aruh se le aparesiya un Malah (Anjelo) nombrado Magid ke le deskuvriyo los sekretos de la Tora, i lo aziya andar en kamino del Dyo. A este nombre del Malah eskrivyo el Rabino Yosef Karo un livro nombrado Magid Yesharim. En este livro dize el Rabino, de ser la persona syempre umilde, de no aravyarse por ninguna koza, no ensanyarse del todo. Tambien tira la atansyon dizyendo, aleshate de la ravya i la sanya, malgrado ke te izyeron aravyar i ensanyarte. La sensya ke tu saves, enbezala a todos. Finalmente los konsejos ke da a el ombre es de konportar kon la djente kon repozo lo ke demanda el Kriyador, la Tora i la konsensya de nozotros.
