El enverano, las eskolas i la korona

Silvyo OVADYA Judeo-Espanyol
1 Temmuz 2020 Çarşamba

Kada noche antes de komer, en komyendo o dospues de komer estamos asprerando lo ke va dizir el Ministro de la Sanedad sovre lo ke afito este diya en muestro payis. Dos mezes antes estavan siguros ke a la fin del mez de Djunyo estavan asperando serka de 100 muevos kavzos de Korona kada diya; ma malorozamemte ay 4-5 diyas ke estamos en los 1.300.

  En primero disheron ke el egzamen para entrar a las universidades se va realizar a la fin del mez de Djulyo. En supito vimos ke lo realizaron un mez antes. En la prensa esta eskrito ke es el dezeo del Ministro de la Kultura i del Turismo. Komo es el patron de una de las mas emportantes kompanyias de turizmo en muestro payis, disheron ke kijo esto i organizaron el egzamen un mez mas presto. Ya savesh ke los ke partisiparon a este egzamen son los miembros de la jenerasyon Z. Me puedesh demandar kualo es la jenerasyon Z. Son las personas ke nasyeron despues del anyo 2000. No so eksperto, no so psikologo. Ma tengo un ijo de la jenerasyon Z i una ija ke apartiene a la cenerasyon Y (los ke nasyeron entre los anyos 1980-1999. Tuve el mazal de konoser dos jenerasyones diferentas. Komo so miembro de la jenerasyon “Baby Boomers” (1946-1965) es mi dover de analizar las muevas jenerasyones.

  Despues del karar del egzamen, los mansevos de la jenerasyon Z izyeron lo ke pudyeron para abashar la nota de la kompanyia del Ministro de Turizmo. I reusheron. Agora la Kompanyia tyene la nota 1. Todos estan avlando lo ke va afitar en la eleksyon ede 2023. Se dize ke el 20% de los elektores van a ser los miemros de la jenerasyon Z i el ke kere ganar estas eleksyones deve de lavorar sovre estos votos.

  Mi ija ke tyene un restorante en Londra kon su marido me dize ke tyene de menester de un/una mansevo/a de la jenerasyon Z para la media sosyala. Oy en diya los restoranes (mismo si son de alta kalidad) tyenen de menester de ser mantenidos por la media sosyala. No aviya entendido muy bueno en el empesijo. Ma oy empesi a entender. Un amigo ke tengo i ke se okupa de un komersyo de elementos para burakar, kalemes para eskrivir en todo modo de materyal ay anyos ke lavora para dar haber a sus klientes. I me disho ke tyenen 1.000 klientes en la media sosyal. Su ijo ke estudyo en las Amerikas tornando a Estanbol, vino ayudar a su padre. Despues de una semana los klientes pujaron a 4000 i estava dizyendo ke va reushir a tener 10000 en dos semanas. Kale dar valor a los miembros de esta jenerasyon. Si no savesh sovre jenerasyones X – Y – Z, puedesh meldar buen karar de kozas en el internet.

 

 

 

 

Siz de yorumunuzu yapın

Tüm Yorumları Görün