UN BIERVO MOS AZE AKODRAR UNA ISTORIA

Eliz GATENYO Judeo-Espanyol
24 Haziran 2020 Çarşamba

En vezes demandan a una persona: Kontamos una istoryika! Esta demanda ke viene en supito, no traye nada al tino. Kuando meldi el jurnal Şalom de esta semana, vide el artikolo de Haymi Behar sovre los pishkados. Me izo akodrar los diyas de mi chikes. 

En la kaza de mis padres kaje kada diya komiyamos pishkado. Les plaziya muncho. Noche de Shabat me akodro ke lo mas komiyamos Sifyo (Kılıç balığı) o Gaya kon avramila. Siguro i otros pishkados gizados kon pirishil i domat o agristada o a la shaka.  

Komo komiyamos muncho pishkado, teniyamos i un “Balikchi de la famiya”. El no mos dava pishkado ke “no vale”. Siempre merkavamos de el por ke teniyamos konfiyensa. Este Balikchi, ke munchos konosiyan, era Avram Monguldar z”l. A esta okazyon lo nombraremos kon buenos rekuerdos. 

Mi mama se entendiya muncho de pishkados. Ke pishkado es fresko, kual pishkado vamos a komer i en ke sezon se kome. Por esto eya merkava el pishkado. 

Un diya en lo ke estavamos en la kampanya en Büyükada, sali yo a merkar pishkado. Me fui ande Mösyö Avram i le demandi si tiene sardela freska. Mösyö Avram me disho, tu mama merka siempre Gaya. Tengo muy ermoza Gaya ni muy chika ke es solo espinas i ni muy grande ke es komo savor de paja. Le respondi. Mersi muncho Mösyö Avram, no kero Gaya esta semana por ke van a vinir mis ijas i los yernos a komer; a mi yerno no le plaze Gaya. Se les avriyo los ojos de Mösyö Avram. Atyo hanuma, deke no le plaze Gaya a tu yerno? No es djudyo tu yerno? Le dishe: Si ya es djudyo ma no le plaze Gaya. No se estava kreyendo, ke mi yerno era djudyo i no le plaziya Gaya. 

Komo vesh, el artikolo de Haymi Behar de la semana pasada me enspiro el artikolo de esta semana. 

Keridos lektores, esta semana fiestamos aki en Turkiya, “El diya de los padres”. Ser padre es ser una pared alta i rezya. Eyos son muestra sigurita, ke no mos manken. Kreyo ke en Israel no se fiesta. Ke se fiesta o no, auguro a todos los padres del mundo entero, i a los ke van a ser padres, un buen diya. Ke seygan padres alegres. Los nombramos kon respekto a los padres ke estan en Gan Eden. 

Siz de yorumunuzu yapın

Tüm Yorumları Görün